Ginasut a ribu ti mababautisaran iti kada tawen, isu a kasapulan ti organisasiontayo ti ad-adu pay a pasilidad. Gapu iti dayta a panagrang-ay, nakaplano dagiti Local Design/Construction Department iti intero a lubong nga agibangon wenno ag-renovate iti nasurok a 2,700 a lugar a pagdaydayawan bayat ti 2020 a tawen serbisio. a

 Ngem saan a natuloy dagita a plano gapu iti COVID-19 pandemic. Tapno maprotektaran dagiti kakabsat ken masurot dagiti regulasion ti gobierno, impasardeng pay laeng ti Publishing Committee ti Bagi a Manarawidwid ti kaaduan a proyekto iti konstruksion iti intero a lubong. Nupay kasta, sakbay ti pandemic, bayat ti 2020 a tawen serbisio, nasurok a 1,700 a lugar a pagdaydayawan ti naibangon ken na-renovate. Naileppas met ti nasurok a 100 a dadakkel a proyekto dagiti sangay. Kitaentayo no kasano a nabenepisiaran dagiti kakabsat iti dua a nalpas a proyekto.

 Sangay ti Cameroon. Ti dati a sangay nga adda iti Douala ket nakabasbassit isu a kasapulan ti dakdakkel. Inadal ti Publishing Committee ti pannaka-renovate ti sangay ngem dakdakkel ti magastos ngem iti bayad ti intero a pasilidad. Inkabilanganda met ti posibilidad a gumatang iti lote a pagibangonanda wenno gumatang iti pasdek sada i-renovate dayta, ngem agpada a saan a natuloy dagita.

 Kabayatanna, naammuan dagiti kakabsat a plano ti gobierno ti mangaramid iti kalsada iti amianan ti Douala, a lumabas iti maysa kadagiti Assembly Hall-tayo. Gapu ta addan kalsada, nalaklakan a maibiahe dagiti kasapulan para iti pasdek. Dayta ti eksakto a kasapulan ti sangay. Isu nga inaprobaran ti Bagi a Manarawidwid a maibangon ti baro a sangay iti maysa a paset ti lote ti Assembly Hall.

 Nagtinnulong a nagtrabaho dagiti kakabsat ken dagiti nabayadan a contractor iti daytoy a proyekto, isu a nakainuttayo iti kuarta ken oras. Kinapudnona, dandani 100,000,000 a pisos ti nainuttayo! Nakaakar ti pamilia ti Bethel kadagiti baro a pasilidad sakbay la unay a nagwaras ti COVID-19.

 Nasaysayaaten ti pagyanan ken pagtrabahuan dagiti Bethelite iti Cameroon, ken ibilangda a regalo ni Jehova ti baro a sangay. Imbaga ti maysa nga agassawa, “Nagaggagetkami manen nga agtrabaho ken ipatpategmi unay daytoy a regalo.”

 Tojolabal Remote Translation Office (RTO), iti Mexico. Adu a tawen a nagtrabaho ti Tojolabal translation team iti sangay ti Central America nga asideg iti Mexico City. Ngem kaaduan nga agsasao iti lengguahe a Tojolabal ket adda iti Altamirano ken Las Margaritas, a dandani 1,000 a kilometro (620 mi) ti kaadayona! Isu a marigatanen dagiti translator nga agipatarus iti Tojolabal iti natural a pamay-an. Ken marigatan met ti sangay nga agbirok kadagiti kualipikado a kakabsat iti asideg a mausar nga agipatarus iti Tojolabal ken tumulong iti audio recording.

 Gapu kadagita a rason, kayat ti Writing Committee ti Bagi a Manarawidwid nga iyakar ti translation team iti lugar nga adu ti agsasao iti Tojolabal. Isu a gimmatang ti sangay iti building sa na-renovate dayta. Nalaklaka ti magastos iti dayta ngem ti agibangon ken agrenta kadagiti opisina.

 Imbaga ti maysa a translator no kasano a nabenepisiaran: “Iti sangapulo a tawenko nga agtrabtrabaho kas translator iti sangay, awan pay ti naam-ammok nga agsasao iti lengguahemi iti asideg uray maysa laeng a pamilia. Ita ta addan ti opisinami iti lugar nga adu ti agsasao iti Tojolabal inaldawen a makatungtongko ida. Adu ti nasursurok a baro a sao ken nasaysayaaten ti panagipatarusko.”

 Iti 2021 a tawen serbisio, naiplano a maaramid ti 75 nga RTO ken dagiti pasilidad para iti teokratiko nga eskuelaan, no ipalubos ti situasion. Maituloy met ti walo a dadakkel a proyekto dagiti sangay. Karaman iti dayta ti baro a proyekto ti sangalubongan a hedkuarter iti Ramapo, New York, ken ti relokasion ti sangay ti Argentina ken Italy. Nasurok pay a 1,000 a baro a Kingdom Hall ti kasapulan, nasurok nga 6,000 ti saanen a presentable a paggigimongan isu a kasapulan a masuktan, ken 4,000 met a Kingdom Hall ti kasapulan a ma-renovate.

 Pangal-alaantayo iti pondo para iti proyekto a panagibangon ken panag-renovate? Dayta a saludsod ket sinungbatan ni Brother Lázaro González, a miembro ti Komite ti Sangay ti Central America, bayat a pagsasaritaanda ti proyekto a Tojolabal Remote Translation Office. “Limitado ti pondo ti sangaymi isu a no awan ti suporta dagiti kakabsat iti intero a lubong, imposible a maibangon dagiti translation office para kadagiti kakabsattayo a katutubo. Nakatulong dagiti donasion dagiti kakabsat iti intero a lubong tapno mayakar dagiti translator iti lugar a pakaus-usaran ti lengguaheda. Naimpusuan nga agyamankami kadagiti kakabsat iti intero a lubong gapu iti adu a suportada.” Posible a malpas dagitoy a proyekto gapu kadagiti donasionyo para iti sangalubongan a trabaho, nga adu kadagita ket naawat manipud iti donate.pr418.com.