Idi Enero 2021, inyanunsio ti Bagi a Manarawidwid ti pannakairuar ti baro a pangyadal iti Biblia, ti Agbiagka a Naragsak iti Agnanayon! a Ania ti reaksionmo iti dayta nga anunsio? Kuna ni Matthew a taga-Canada: “Eksaytedak! Ken lallalo manen a nagagaranak idi naipakaammo kadagiti palawag ken video no kasano a naaramid ken natesting dayta. Kayatko la unayen a makita ken mausar dayta.”

 Iti libro nga Agbiagka a Naragsak iti Agnanayon!, baron ti pamay-an iti panangyadal iti Biblia. Ngem saan la a dayta ti nakaidumaanna kadagiti immun-unan nga inusartayo a pangyadal iti Biblia. No nayimprenta a kopia ti Agbiagka a Naragsak iti Agnanayon! ti us-usarem, mabalin a madlawmo a naiduma ti klase dayta a libro. Tapno maammuantayo, kitaentayo no kasano a naaramid dayta.

 Napuspuskol ti papelna. Apay a masapul a kasta? Ti libro nga Agbiagka a Naragsak iti Agnanayon! ket addaan iti nasurok nga 600 a dekolor ken napipintas a ladawan, dandani mamin-10 nga ad-adu ngem iti libro nga Isuro ti Biblia! Nalawlawa met ti margin ti tunggal panidna. Ngem nangpataud dagita iti problema: No naingpis ti papel, mabalin a madlaw dagiti ladawan iti bangirna a panid. Tapno masolbar dayta, dagiti kakabsat iti International Printing Department (IPD), idiay Wallkill, New York, U.S.A., pinadasda ti uppat a klase ti papel nga us-usarentayo iti panagimprenta. Kinita a naimbag ti Writing Committee ti Bagi a Manarawidwid ti tunggal sample ken pinilida ti saan unay a transparent wenno saan nga aragaag a papel. Nanginngina dayta iti 16 a porsiento ngem iti papel nga us-usarentayo iti kaaduan a publikasiontayo. Ngem ti tunggal panid ti Agbiagka a Naragsak iti Agnanayon! ket nalawag a mabasa dagiti mayad-adalan iti Biblia a saanda a masinga kadagiti ladawan iti bangir ti panid a basbasaenda.

 Naiduma ti klase ti akkubna. Naiduma ti akkub daytoy a baro a libro ngem iti dadduma a librotayo gapu iti laminate-na. Saan a ti gloss laminate ti nausar no di ket ti matte laminate tapno nalawlawag a makita ti ladawan. Makatulong met ti matte laminate tapno saan a nalaka a maperdi ti libro uray kanayon a mausar. Ngem maminlima a nanginngina ti matte laminate ngem iti gloss laminate. Gapu iti dayta, nagtitinnulong ti sumagmamano a sangay tapno makagatangda iti nalaklaka a matte laminate.

 Apay a dagiti nanginngina a materiales ti nausar? Inlawlawag ti maysa a kabsat nga agtrabtrabaho iti IPD: “Ekspektarenmi a kanayon a mausar daytoy a libro isu a kayatmi a napintas latta ti itsurana uray mamin-adu a mausar.” Imbaga ni Eduardo nga agtrabtrabaho iti Printery Office iti sangay iti Brazil: “Maragsakankami unay a makakita no kasano nga us-usaren ti organisasion ni Jehova dagiti dekalidad a materiales tapno maaramid daytoy nagpintas, nalagda, ken komportable nga iggaman a libro bayat a nainsiriban a maus-usar dagiti naidonar a pondo.”

 Rinugianmi nga inyimprenta ti Agbiagka a Naragsak iti Agnanayon! idi Marso 2021 bayat ti COVID-19 pandemic, isu nga adda dagiti problema. Gapu ta naka-lockdown ti Bethel, saan a mabalin ti agawis kadagiti Bethel commuter wenno kadagiti agserbi kas kabbaro a Bethelite tapno tumulong iti panagimprenta. Kas resultana, kurang dagiti tumulong iti panagimprenta ken temporario a nagserra ti dadduma a pagimprentaan gapu kadagiti restriksion ti gobierno.

 Kasano a nasolbar dagita? Idi mabalin manen ti agimprenta, nakiddaw kadagiti kakabsat iti nadumaduma a departamento iti Bethel a tumulongda iti panagimprenta. Kinuna ni Joel nga agtrabtrabaho iti IPD: “Nairingpasmi ti trabaho ta managsakripisio dagiti kakabsat ken kayatda ti makasursuro.”

 Iti laksid dagiti problema, nakayimprentakamin iti minilion a kopia ti Agbiagka a Naragsak iti Agnanayon! Tapno maaramid dagita, kasapulan ti nakaad-adu a materiales a kas kadagiti printing plate, laminate film, papel, tinta, ken pigket. Iti laeng immuna a lima a bulan ti panagimprenta, nasurok a $2.3 million (U.S.) wenno agarup ₱120 million ti nagastos kadagiti materiales laeng. Tapno makainut iti gastos, ti nayimprenta pay laeng ket dagiti bilang ti libro nga aktual a kasapulan dagiti kongregasion.

 Ania ti makuna dagiti dadduma a mangyad-adal ken dagiti iyad-adalanda iti daytoy a baro a pangyadal iti Biblia? Imbaga ti kabsat a ni Paul a taga-Australia: “Makapa-enjoy unay nga usaren ti Agbiagka a Naragsak iti Agnanayon! isu a maragragsakanak a mangyadal iti Biblia. Nagpintas ti layout ti libro ken talaga a magustuan unay ti mayad-adalan nga adalen dayta. Nagmayat dagiti linaonna a nalawag nga impormasion, makatukay-puso a salsaludsod, video, ladawan, tsart, ken ti paset a padasen nga aramiden ti mayad-adalan. Maysa nga obra maestra dayta a mangparegta kaniak a mangpasayaat iti panangisurok.”

 Kinuna ti maysa a mayad-adalan iti Biblia a taga-United States: “Magustuak unay ti baro a libro. Tultulongannak dagiti ladawan tapno maawatak dagiti kangrunaan a punto. Natukay ti pusok kadagiti video ken naparegtaak a mangyaplikar kadagiti nasursurok.” Mamindua iti kada lawas a mayadalan ken regularen a makigimgimong.

 Minilion pay a kopia ti Agbiagka a Naragsak iti Agnanayon! ti mayimprentanto iti adu a lengguahe. Kinapudnona, inaprobaran ti Bagi a Manarawidwid ti pannakairuar daytoy a libro iti 710 a lengguahe, 340 nga ad-adu ngem iti naaprobaran para iti libro nga Isuro ti Biblia!

 Pangal-alaanmi iti pondo para iti panagimprenta? Babaen kadagiti donasion iti sangalubongan a trabaho. Adu kadagita ket naited babaen ti donate.pr418.com. Agyamankami iti kinaparaburyo a makatulong iti panangaramidmi kadagiti publikasion a pangyadal iti Biblia kadagidiay kayatda nga ammuen ti maipapan ken Jehova ken ‘agbiag nga agnanayon.’—Salmo 22:26.