“Inkeddeng ti Bagi a Manarawidwid, no awan la ketdi ti aniaman a restriksion ti gobierno iti lugaryo, iparegtami iti amin a kongregasion nga irugidan ti aggigimong iti in-person inton lawas ti Abril 1.” Naragsakan dagiti Saksi ni Jehova iti intero a lubong iti dayta a pakaammo, a nai-post iti jw.org iti nasapa a paset ti Marso 2022. Ngem saan pay a nagpatingga ti COVID-19 pandemic. a Ania dagiti panagbalbaliw, materiales, ken equipment a kasapulan tapno maprotektaran iti virus dagiti makigimong? Kalpasan ti dua a tawen nga awan ti in-person a panaggigimong, nakasagana ngatan a mausar dagiti Kingdom Hall-tayo?

 Kinapudnona, adun a bulan nga agsagsagana dagiti kakabsattayo para iti pannakaisubli dagiti gimong iti Kingdom Hall.

 Makabulan laeng kalpasan a naisardeng dagiti in-person a gimong idi 2020, inrugi nga analisaren ti Worldwide Design/Construction Department (WDC), idiay Warwick, New York, no kasano a makaapektar ti COVID-19 iti pamay-an ti panagusartayo iti Kingdom Hall ken ania dagiti addang a kasapulantayo tapno agbalin a natalged dagiti paggigimongantayo.

 Masansan nga agduduma ti kasapulan ti nadumaduma a lugar. Imbaga ni Matthew De Sanctis, nga agtrabtrabaho iti WDC: “Iti dadduma a pagilian, ti maysa a problema ket ti kaawan ti pagbugguan ti ima. No awan ti gripo iti Kingdom Hall, masapul a magatang ti danum wenno masakdo iti karayan wenno iti bubon. Iti dadduma a pagilian, in-adjust ti dadduma a gobierno dagiti pagalagadanda maipapan iti air-condition, bentilasion, ken plakard maipapan iti salun-at ken hygiene.”

 Kasano a sinolusionan dagita dagiti kakabsat? Nakitada nga iti adu a Kingdom Hall, “epektibo dagiti simple ken saan a nangina a solusion,” kuna ni Matthew. Kas pagarigan idiay Papua New Guinea, naaramid dagiti simple a pagbugguan ti ima, a nausar dagiti plastik a timba a 20 a litro (5.3-gal) ti makargana, sa naikkan kadagiti faucet. Nakagastos laeng dagiti kakabsattayo iti agarup ₱2,300 ($40 U.S.) para iti pagbugguan ti maysa a gagangay a Kingdom Hall iti away. Para kadagiti Kingdom Hall iti Africa, nasurok a 6,000 a dekalidad a pagbugguan ti nagatang iti maysa a supplier iti Asia.

 Ti dadduma pay a panagbalbaliw ramanenna ti panang-install wenno panangbaliw kadagiti electric fan ken bentilasion tapno sumayaat ti panagrikus ti angin iti Kingdom Hall. Adu a kongregasion ti naggatang kadagiti mic boom tapno saanen a maipasa dagiti roving microphone. Adda dagiti naaramid a pamay-an tapno maliklikan ken regular a ma-sanitize dagiti masansan a masagid wenno maiggaman, kas iti pagiggaman ti ridaw ken faucet a mabalin a pakayakaran ti virus. Iti restroom wenno CR ti dadduma a kongregasion, nang-install-da kadagiti faucet nga adda sensor-na nga automatiko nga agubo ti danum. Idiay Chile, ti average a magastos para iti tunggal Kingdom Hall ket nasurok nga ₱81,000.00 ($1,400 U.S.).

 Uray prioridad dagiti kakabsattayo a pagbalinen a natalged dagiti Kingdom Hall, ikagkagumaanda met ti makainut kadagiti naidonar a pondo. Kas pagarigan, iti dadduma a pagilian, gungundawayanda dagiti tax exemption para iti pagbugguan ken mic boom. Nagtitinnulong dagiti sanga nga opisina tapno makainutda iti pondo babaen ti panaggatangda iti ad-adu a suplay. Masansan nga iyurnos dagiti sangay ken ti Global Purchasing Department ti direkta a panaggatang kadagiti suplay manipud kadagiti manufacturer, isu a saan laeng a naksayan ti presio dagita no di ket naparpartak pay ti pannakaideliberda.

 Dagiti urnos a naaramid tapno nataltalged dagiti Kingdom Hall ti nangprotektar ken nangpabileg iti panagtalek dagiti umatender kadagiti gimong. Inamin ni Dulcine, a sister a taga-Peru, a “medio maamak” idi naammuanna nga agsublitayon nga aggigimong iti Kingdom Hall. Imbagana: “Na-COVID-ak idi rugrugi ti pandemic. Isu a mabutengak a mapan iti Kingdom Hall ta amangan no maakaranak manen iti virus. Ngem idi nakadanonak iti Kingdom Hall, nakitak nga adu ti inaramid dagiti panglakayen a pamay-an ti panagannad, kas iti panagusar iti hand sanitizer ken mic boom, kasta met ti panang-disinfect iti Kingdom Hall sakbay ken kalpasan ti gimong. Gapu kadagita natalgeden ti riknak a mapan.” b

 Sabali met idi ti problema ti sister a ni Sara a taga-Zambia. Inyestoriana: “Mano a bulan pay laeng a natay ni lakayko iti COVID-19. Madandanaganak no anianto ti mariknak no makigimongak a saankon a kadua ni lakayko.” Ania ti nariknana idi nakigimong? Imbagana: “Napaneknekak nga adda kadatayo ni Jehova bayat dagitoy maudi nga al-aldaw gapu iti face-to-face a gimong. Mas lalo pay ita a nariknak ti pammaregta, ayat, ken suporta dagiti panglakayen ken dadduma a kakabsat.”

 Maragragsakan dagiti padatayo nga agdaydayaw iti intero a lubong ta makapantayo manen iti Kingdom Hall. Pagyamanan kadagiti donasionyo, a kaaduan kadagita ket maar-aramid babaen ti donate.pr418.com. Nakatulong dagitoy a donasion tapno masigurado a dagiti sentro ti pudno a panagdaydayaw ket komportable ken natalged a paggigimongan.