Iti tawen 2020, nagadu dagiti kalamidad ken nangrugi ti COVID-19 pandemic iti intero a lubong. Kasano a tinulongan dagiti Saksi ni Jehova dagiti naapektaran?

 Bayat ti 2020 a tawen serbisio, a inaprobaran ti Coordinators’ Committee ti Bagi a Manarawidwid a mausar ti pondo a nasurok a 1.3 bilion a pisos (28 million dollars) b a pangtulong kadagiti nadidigra. Isu a natulongan dagiti biktima iti nasurok a 200 a kalamidad—karaman ditoy ti COVID-19 pandemic, napipigsa a bagyo, panaglayus iti Africa, nakaro a bisin iti Venezuela, ken nakaro a tikag iti Zimbabwe. Nausar dagiti naidonar a pondo a nanggatang iti makan, danum, pagyanan, bado, ken agas, kasta met dagiti suplay a nausar iti panagdalus, panagtarimaan, ken panagibangon manen. Dagitoy ti dadduma a naipaay a tulong kadagiti nadidigra.

 COVID-19. Iti intero a lubong, naapektaran ti pisikal, emosion, ken pinansial a kasasaad dagiti kakabsattayo gapu iti pandemic. Tapno matulonganda, adda nasurok a 800 a Disaster Relief Committee (DRC) iti intero a lubong a mangkita kadagiti kasapulan dagiti kakabsat sa ireportda a dagus iti Coordinators’ Committee. Iti kasta, makita ti Coordinators’ Committee ti kasayaatan a pamay-an a maipaay ti tulong.

 Iti intero a tawen, iti tulong ti DRC adu ti nakaala iti makan, danum, suplay a pangprotektar iti salun-at, ken agas. Iti dadduma a lugar, nakitinnulong ti DRC kadagiti panglakayen sadiay tapno maala dagiti kakabsat ti tulong ti gobierno.

 Uray dagiti saan a Saksi napansinda ti panangtulongtayo kadagiti nadidigra. Kas pagarigan, imbaga ti district commissioner iti Nakonde, Zambia a ni Field Simwinga kadagiti kakabsattayo: “Agyamyamankami ta impaayyo ti kasapulan dagiti naapektaran a pamilia.”

 Nakaro a Bisin iti Angola. Gapu iti COVID-19 pandemic, bimmassit ken ngimmina unay ti suplay ti makan idiay Angola. Isu nga adu a kakabsattayo ti marigatan unay a gumatang iti makan.

 Nayurnos a ti Brazil branch ti mangipatulod kadagiti suplay a makan kadagiti kakabsattayo idiay Angola. Tapno makainut iti pondo, nakambas dagiti makan ken ti kalakaan a pamay-an a maipatulod dagiti suplay ken bulto a nagatang dagiti makan. Isu a nasurok a 1,000 a pisos (22 dollars) laeng ti tunggal relief package. Naglaon dayta iti agbainte a kilo a makan kas iti bagas, bukbukel, ken manteka. Iti agdama, addan naipatulod a 33,544 a relief package nga agdagsen iti 654 a tonelada (721 U.S. tons). Nainayon dayta kadagiti suplay a naggapu a mismo iti Angola. Nasurok a 50,000 a tattao ti nakaawat kadagitoy a tulong!

 Ania ti makuna dagiti kakabsattayo iti naawatda a tulong? Imbaga ni Alexandre, nga aggigian iti nakaad-adayo a paset ti Angola: “Ibilangko daytoy nga ebidensia nga ay-ayatennak ni Jehova ken saanak nga agmaymaysa. Talaga nga ipatpategnak ti organisasion ni Jehova!” Imbaga ni Mariza, nga agsolsolo nga ina: “Nangngeg ni Jehova ti panagpakpakaasik. Agyamyamanak kenkuana ken iti organisasionna!”

 Tikag iti Zimbabwe. Bayat ti 2020 a tawen serbisio, adda nagkaro a tikag iti Zimbabwe, isu a minilion a tattao ti nakapasar iti nakaro a bisin. Awan ti umdas a makan ti rinibu a Saksi iti Zimbabwe.

 Adda lima a DRC sadiay a timmulong tapno maiwaras dagiti makan kadagiti kakabsat. Ginasut a kakabsat ti timmulong nga agi-repack kadagiti makan, agikarga kadagiti suplay, wenno nagipabulod iti luganda. c Bayat ti 2020 a tawen serbisio, nasurok a ₱33,200,000 ($691,561 U.S.) ti nagastos para iti suplay ti makan ti nasurok a 22,700 a tattao!

 Adda dagiti kakabsat nga awanen ti kanenda idi simmangpet ti tulong. Indaydayawda ni Jehova idi simmangpeten ti makan, nga uray la napakanta ti dadduma iti Kingdom song.

 Iti maysa a lugar, dua a balo a Saksi ti immatender iti miting ti komunidad tapno mapagsasaritaan ti suplay a relief nga ited ti maysa a pribado nga organisasion (NGO). Ngem in-inut a nalaokan iti politika ti miting, isu a nagdesisionda a pumanaw ta dida maawat dagiti kondision tapno maikkanda iti tulong. Idi pumanawdan, inuy-uyawda ida ken imbagada, “Dikay dumawdawat iti makan kadakami!” Ngem kalpasan laeng ti dua a lawas, simmangpet dagiti kakabsattayo a mangipaay iti tulong ken inikkanda ida iti suplay a makan—ngem awan pay ti suplay a relief manipud NGO!

 Ti panangtulong kadagiti nadidigra iti Zimbabwe ket nagresulta iti nasayaat a pangsaksi. Kas pagarigan, alaentayo ti kapadasan ni Prisca, nga aggigian iti maysa a bassit a barrio. Uray narigat ti situasion gapu iti tikag, makiramraman latta ni Prisca iti ministerio kada Mierkoles ken Biernes uray panagmumula. Inuy-uyaw dagiti kalugaranna nga imbagbagada: “Agbisin ti pamiliam ta kasabaka a kasaba.” Insungbat met ni Prisca: “Saan a pulos baybay-an ni Jehova dagiti adipenna.” Di nagbayag, nakaawat kadagiti suplay a relief manipud iti organisasiontayo. Nagsiddaaw ti dadduma a kaarrubana. Imbagada ken Prisca: “Dinaka pulos binaybay-an ti Diosmo, isu a kayatmi a maam-ammo.” Pito kadagiti kaarrubana ti agdengdengngegen kadagiti gimong ti kongregasion a maibrodbrodkas iti radio.

 Bayat nga umas-asideg ti panungpalan, addanto latta kalamidad. (Mateo 24:3, 7) Agyamyamankami unay iti nabuslon a donasionyo nga impaayyo babaen kadagiti nadumaduma a pamay-an ti panagdonar nga adda iti donate.pr418.com. Mausar dayta iti nasayaat a pamay-an tapno maipaayan iti tulong dagiti agkasapulan a kakabsat.