Bayat ti 2021 tawen serbisio, a nagtultuloy a marigrigatan dagiti tattao iti intero a lubong gapu iti COVID-19 pandemic. Kas nailawlawag iti artikulo a “Sangalubongan a Relief Para iti Sangalubongan a Pandemia,” nakagastotayo iti minilion a doliar b iti relief para iti pandemia ken nangbukeltayo iti nasurok a 950 a Disaster Relief Committee.

 Kinapudnona, bayat ti panagtultuloy ti pandemic, maap-apektaran met dagiti kakabsattayo iti intero a lubong iti dadduma pay a natural a didigra ken didigra nga aramid ti tao. Gapu kadagiti kasta a nasurok a 200 a didigra, inaprobaran ti Coordinators’ Committee ti Bagi a Manarawidwid a mausar ti $8 a milion (nasurok a ₱399 a milion) kas kanayonan para iti pondo ti COVID-19. Kitaem no kasano a nausar dagiti donasionmo a mangtulong kadagiti biktima ti dua a nabiit pay a didigra.

 Idi Mayo 22, 2021, nangrugi a bumtak ti Mount Nyiragongo, maysa a bulkan iti Democratic Republic of the Congo. Ti nagayus a lava dinadaelna dagiti balay, eskuelaan, ken maysa a paggapuan ti suplay a danum. Ngem saan laeng a ti lava ti delikado. Sumagmamano nga aldaw kalpasan ti panagbettakna, nangipugso iti makasabidong a tapok iti siudad ti Goma ken adda nairekord nga adu a panagginggined. Naibilin nga agbakuit ti nasurok a kagudua ti populasion ti siudad. Ginasut a ribu ti nagkamang, a dadduma kadakuada ti napan idiay Rwanda.

 Karaman kadagidiay nagbakuit ket ti agarup 5,000 a Saksi ni Jehova. Napukaw ti dadduma dagiti balayda gapu iti panagbettak ti bulkan; natakawan met ti dadduma kalpasan ti ipapanawda. Nagtinnulong a nangipaay iti panangsaranay dagiti relief committee iti Rwanda ken ti Democratic Republic of the Congo. Maipapan iti maysa a relief committee, inreport ti sangay iti Congo (Kinshasa): “Uray nagulo ti situasion iti siudad ken sakbay pay a naibilin ti panagbakuit, nangrugin ti komite nga agiwaras iti makan, danum, pagiddaan, ken badbado.” Iti maysa nga ili a nasurok a 2,000 a kakabsattayo ti nagtitipon, nangibangon ti maysa a relief committee kadagiti tolda, nangtedda kadagiti mask, ken inlawlawagda no kasano a maksayan ti posibilidad a maakaranda iti COVID-19 ken cholera (nakaro a panagsarua ken panagtakki).

 Iti uneg ti tallo a bulan kalpasan ti didigra, nakaiwaras dagiti kakabsattayo iti nasurok nga innem a tonelada a bagas, innem a tonelada nga arina a mais, tallo a tonelada a manteka, ken tallo a tonelada a danum. Tapno makainut ti sangay iti pondo, gimmatangda iti binulto a suplay a taraon iti mismo a lugarda imbes nga agorderda iti nanginngina iti sabali a pagilian.

 “Napalalo ti pannakaupaymi ken maladladingitankami unay,” imbaga ti maysa a sister a nadadael ti baro a balayda gapu iti panagbettak ti bulkan. Ngem immawat ti pamiliana iti pisikal ken naespirituan a tulong. Kunana itan: “Iti tulong ni Jehova, adda latta dagiti kasapulanmi. Nakitami a tultulongannakami ni Jehova a mangbagkat iti awitmi isu a nalaklakami nga ibaklay dagita.”

 Nabayagen nga adda krisis ti ekonomia ti Venezuela. Ib-ibturan dagiti kakabsattayo sadiay ti narigat a kasasaad ti panagbiag, kurang a taraon, ken umad-adu a krimen. Ngem saan a binaybay-an ida ti organisasion ni Jehova.

 Iti napalabas a tawen serbisio, nasurok a $1.5 a milion (agarup ₱75 a milion) ti nagastos iti panaggatang ken panangibiahe kadagiti taraon ken sabon para kadagiti pamilia nga agkasapulan iti tulong. Inreport ti sangay ti Venezuela: “Saan a nalaka nga ibiahe ti 130 a tonelada a taraon iti amin a paset ti pagilian kada bulan sa iwaras dagita kadagiti kakabsat nga agkasapulan.” Tapno masigurado a saan a madadael dagiti taraon, masansan a dagiti saan a nalaka a maperdi a taraon ti ipatulod dagiti kakabsat. Innayon ti sangay: “Gatangenmi iti binulto ti kaaduan a taraon ken no kaadu dagita, kasta met, no nalaka ti presioda. Kalpasanna, ibiahemi dagita iti pamay-an a makaekonomiakami.”

 Magusgustuan ni Leonel ti asaynmentna kas miembro ti Disaster Relief Committee iti Venezuela. “Espesial a trabaho ti panangsaranay,” kunana. “Talaga a napabilegak iti daytoy a pribilehio sipud natay ti patpatgek nga asawa iti COVID-19. Adu ti ar-aramidek ken mariknak a napategak kadagiti kakabsat nga agkasapulan. Nakitak a mismo no kasano a tungtungpalen ni Jehova ti karina a saanna a baybay-an ti ilina.”

 Maysa a kabsat a natulongan ti dati nga agserserbi iti relief committee. “Siak met itan ti agkasapulan iti tulong,” imbagana. “Saan la a material a tulong ti naawatmi ken baketko. Tinulongandakami met dagiti kakabsat nga agtalinaed a kalmado. Inaywanan, liniwliwa, ken pinaregtadakami.”

 Awan pakakitaan wenno pakdaar a dumteng ti dadduma a didigra. Ngem masansan nga alisto a makaala ken maideliber ti organisasion ni Jehova dagiti relief supply, gapu kadagiti donasionyo para iti sangalubongan a trabaho. Ti dadduma a pamay-an ti panagdonar ket nailawlawag iti donate.pr418.com. Apresiarenmi ti kinaparaburmo.