Impakpakauna ti Biblia nga iti tiempotayo, addanto dagiti gubat, ginggined, makapapatay a sakit, ken dagiti “nakabutbuteng a buya.” (Lucas 21:10, 11) Agtultuloy a matungtungpal daytoy a padto bayat ti 2022 a tawen serbisio. a Kas pagarigan, agtultuloy ti gubat idiay Ukraine, a mangap-apektar iti biag ti minilion a tattao. Di pay nakaungar ti lubong iti COVID-19 pandemic. Kasta met, adu a tattao ti naapektaran iti kalamidad, kas iti ginggined idiay Haiti ken napipigsa a bagyo iti Central America, Pilipinas, ken southeastern Africa. Kasano a tinulongan dagiti Saksi ni Jehova dagiti naapektaran?

 Bayat ti 2022 a tawen serbisio, nakaited ti organisasiontayo iti tulong kadagiti biktima iti agarup 200 a didigra! Dandani 12 a milion a doliar b ti nagastotayo tapno maited ti tulong. Kitaentayo no kasano a nausar dagiti donasiontayo tapno matulongan dagiti biktima iti dua a kalamidad.

 Idi Agosto 14, 2021, dinayyeg ti magnitude 7.2 a ginggined ti southern Haiti. Makapaladingit ta tallo a kakabsattayo ti natay—dua a sister ken maysa a brother. Masapul met a sanguen dagiti nakalasat ti pisikal ken emosional nga epekto ti ginggined. Imbaga ti brother nga agnagan iti Stephane: “Nakaad-adu ti natay iti intero a siudad, isu a linawas nga adda maipumpon iti uneg ti nasurok a dua a bulan.” Imbaga ti sabali pay a brother a ni Éliézer: “Adu a kakabsat ti naawanan iti balay, bado, sapatos, ken dadduma pay a kangrunaan a kasapulanda. Adu a bulan a mabutbuteng dagiti tattao gapu ta kanayon ti aftershock.”

 Dagus a timmulong ti organisasiontayo. Nangted ti sangay ti Haiti iti nasurok a 53 a tonelada a makan, kasta met kadagiti tolda, tarpaulin, kudson, ken solar charger para kadagiti selpon. Kanayonanna, bayat ti 2022 a tawen serbisio, nasurok a 100 a balay ti naibangon wenno natarimaan. Nasurok a maysa a milion a doliar ti nagasto para kadagitoy a panangsaranay.

 Kasta unay ti panagyaman dagiti kakabsattayo. Imbaga ni Lorette: “Namimpinsan a dinadael ti ginggined ti balay ken negosiomi. Awan makanmi. Ngem tinulongannakami ti organisasion ni Jehova. Impaayda ti amin a kasapulanmi.” Imbaga ni Micheline: “Pinerdi ti ginggined ti paggigiananmi kadagiti dua nga annakko. Diak ammo ti aramidek isu nga inkararagko a tulongannak ni Jehova, ket sinungbatannak babaen ti organisasionna. Nalagdan ti balay a paggigiananmi. Determinadoak a mangaramid iti amin a kabaelak tapno maipakitak ti panagyamanko ken Jehova.”

 Napaliiw met dagiti lokal nga autoridad ti trabahotayo a panangsaranay. Imbaga ti director ti city hall iti L’Asile: “Komendarankayo ta nagpartakkayo a timmulong. Apresiarek met ta narespetokayo iti autoridad. Maragsakanak ta saankayo a tumultulong gapu iti kuarta, no di ket gapu ta ay-ayatenyo dagiti tattao.”

 Idi Enero 24, 2022, nag-landfall ti bagyo nga Ana idiay Mozambique sa dinalapusna ti Malawi. Gapu iti bagyo, nagpigsa ti tudo ken ti angin—nga immabut iti 100 a kilometro kada oras (62 mph). Natumba dagiti poste ti koriente, nadadael dagiti rangtay, ken nagkaro ti layus.

 Nasurok a 30,000 a Saksi ti naapektaran iti bagyo idiay Malawi ken Mozambique. Imbaga ni Charles, a maysa kadagiti timmulong iti panangsaranay: “Idi nakitak ti rigat dagiti kakabsat ken ti adu a napukawda, naasianak unay kadakuada. Permi ti ladingitko.” Ngem nakarkaro pay, nayanud ti bassit a suplayda a makan ken dagiti mulada. Adu ti napukawan iti balay. Makapaladingit ta maysa a brother ti natayan iti asawa ken dua nga annak a babbai ta nalmesda idi napattog ti rescue boat a naglugananda.

 Nakabutbuteng ti bagyo. Iti 1:00 ti parbangon idiay Nchalo, Malawi, nangngeg ti pamilia Sengeredo ti nakabutbuteng nga uni ti napegges a danum. Dimmakkel ti danum ti dua a karayan! Nagdesision ni Brother Sengeredo a pumanawdan iti balayda. Husto ti inaramidda a desision, ta di nagbayag, narba ti balayda gapu iti layus. Nadadael dagiti gamitda, dadduma met ket nayanud. Nagdesisionda a mapan iti Kingdom Hall, a gagangay a mapagpagna iti 30 a minuto manipud iti balayda. Ngem iti dayta a tiempo, dua nga oras a pinagpagnada. Nabasbasa ken nabambannogda, ngem natalgedda.

 Dagus a rinugian ti sangay ti Malawi ken Mozambique ti tumulong kadagiti nadidigra. Imbagada kadagiti manangaywan iti sirkito ken papanglakayen nga ammuenda ti kasapulan dagiti naapektaran a kakabsat ken ipaayda ti naespirituan ken emosional a tulong. Adda dagiti naapointaran a Disaster Relief Committee (DRC) a mangiwanwan iti trabaho a panangsaranay, ket dagus a tinulongan dagitoy a komite dagiti kakabsat tapno makaalada iti makan ken dadduma pay a kasapulanda. Nasurok a $33,000 ti nagasto para iti naipaay a tulong ken nasurok a $300,000 para iti panangtarimaan ken panangibangon kadagiti balbalay.

 Inusar a naimbag ti DRC ti pondo, lalo ta ngimmina dagiti magatang. Kas pagarigan, iti umuna a pito a bulan ti trabaho a panangsaranay, ngimmato iti agarup 70 a porsiento ti presio ti arina a mais, a kangrunaan a makan idiay Malawi. Ngimmina met ti gasolina. Tapno makainutda iti pondo, gimmatang dagiti kakabsat iti makan ken materiales iti panagibangon iti mismo a lugarda ken adun ti ginatangda. Gapu iti dayta, naka-discount-da ken nakainutda para iti transportasion.

 Natukay ti puso dagiti kakabsat gapu iti trabaho a panangsaranay. Imbaga ni Felisberto, a maysa a brother a taga-Mozambique: “Daytoy pay laeng nga organisasion ti nakaad-adu ti naitulongna, manipud iti materiales a pagibangon, transportasion, boluntario iti konstruksion, makan, ken naayat a panangiwanwan. Daytoy a panangsaranay ket nagsayaat a pagarigan iti nainkabsatan nga ayat a dineskribir ni Jesus iti Juan 13:34, 35.” Imbaga ni Ester, a maysa a balo idiay Malawi a naperdi ti balayna: “Kasla awan idi ti namnamak a maaddaanak iti sabali a balay ta awan met unay ti kuartak. Isu nga idi immay dagiti kakabsat ket imbangonandak iti balay, panagriknak addaakon idiay Paraiso.”

 Bayat nga umas-asidegtayo iti baro a lubong, namnamaentayo nga adu pay dagiti mapadasantayo a didigra. (Mateo 24:7, 8) Ngem gapu iti nabuslon a donasionyo, masiguradomi a maawat ti ili ni Jehova ti tulong a kasapulanda. Makita iti donate.pr418.com dagiti pamay-an iti panagdonar. Pagyamanan iti kinaparaburyo.