Impakpakauna ti Biblia a “bumusorto ti nasion iti sabali a nasion” ken addanto dagiti didigra bayat “ti panungpalan daytoy a sistema ti bambanag.” (Mateo 24:3, 7) Nakitatayo a matungtungpalen dagitoy a padto bayat ti 2023 a tawen serbisio. a Ngem iti laksid dagiti panaglalaban ken natural a didigra iti dandani 100 a pagilian, impakita latta dagiti Saksi ni Jehova ti ayat ni Jehova. Kasano?

 Bayat ti 2023 a tawen serbisio, naapektaran dagiti kakabsattayo iti nasurok a 200 a natural wenno aramid ti tao a didigra. Tapno matulongan dagiti naapektaran a kakabsat, gimmastos dagiti legal a korporasion dagiti Saksi ni Jehova iti nasurok a 10 a milion a doliar b manipud kadagiti donasion para iti sangalubongan a trabaho. Saan pay a nairaman iti dayta dagiti nagasto ti adu a kakabsat bayat ti panagboluntarioda. Ammuem no kasano a nakatulong dagiti donasionmo kadagiti biktima ti dua kadagiti adu a didigra a nangapektar kadagiti kakabsat.

 Masansan a malaylayus ti dadduma a lugar iti Nigeria. Ngem dagiti layus idi Oktubre 2022 ti kakaruan pay laeng a panaglayus iti dayta a pagilian iti uneg ti sangapulo a tawen. Nadadael ti nasurok a 676,000 nga ektaria a pagmulaan, ken nagbakuit ti nasurok a dua a milion a tattao. Dagus a nangapointar ti sangay iti Nigeria kadagiti Disaster Relief Committee a mangorganisar iti trabaho a panangsaranay ken mangipaay iti pammaregta kadagiti kakabsat.

•   7,505 a kakabsat ti nagbakuit

•   860 a balay ti naperdi wenno interamente a nadadael

•   90 a Kingdom Hall ken maysa nga Assembly Hall ti nalayus

 Nasurok a $250,000 ti nagasto iti panangsaranay a pakairamanan dagitoy:

•   Makan kas iti bagas, bukbukel, ken noodles

•   Gamit iti balay kas iti kutson ken moskitero

•   Pannakatarimaan wenno pannakaibangon manen dagiti nadadael a balay

 Kasano a sinigurado dagiti kakabsattayo a saan a masayang dagiti donasion? Ti maysa a pamay-an ket kinitada a naimbag no matarimaan pay wenno saan ti maysa a patakder. No saanen a matarimaan, masuktan dayta iti simple ti diseniona a patakder a gagangay iti lugarda.

 Agyamyaman unay dagiti natulongan a kakabsattayo. Imbaga ti maysa a sister: “Gapu iti layus, kasla nagbaliktad ti lubongmi ta naperdi amin a mulami ken awanen ti balaymi. Ngem limmag-an ti riknami idi immay dagiti kakabsat iti dayta met la nga aldaw tapno tulongan ken ibirokandakami iti natalged a pagyanan. Permi met ti ragsakmi idi nakaawatkami kadagiti makan manipud iti sanga nga opisina. Kasla saankami a mamati a napadasanmi a mismo ti ibagbaga ti Juan 13:34, 35. . . . Talaga nga adda pudno nga ayat. Manipud iti kaunggan ti pusomi, agyamyamanak ken ti intero a pamiliak kadagiti kakabsat nga immay timmulong iti tiempo a kasapulanmi unay.”

 Napaliiw ti dadduma a lumugar ti trabahotayo a panangsaranay. Imbaga ti maysa a lider ti komunidad iti Sabagreia, Bayelsa State: “Nakaad-adu ti organisasion wenno simbaan ditoy lubong, ngem dagiti laeng Saksi ni Jehova ti nakaaramid iti kastoy. . . . Ti organisasion[yo] ti maysa kadagiti kasayaatan iti intero a lubong.”

 Bayat ti Pebrero 2023, nasurok nga 400 nga uram ti nangdadael iti adu a paset ti Chile. Nadadael ti nasurok a 430,000 nga ektaria a daga, kasta met ti dadduma a kapatgan nga imprastruktura iti Chile. Agarup 8,000 a tattao ti nagbakuit. Kalpasan la unay ti didigra, nangorganisar ti sanga nga opisina iti trabaho a panangsaranay.

•   222 a kakabsat ti nagbakuit

•   20 a balay ti interamente a nadadael

 Nasurok a $200,000 ti nagasto iti panangsaranay a pakairamanan dagitoy:

•   Makan ken danum

•   Gasolina, pagdalus, ken agas

•   Pannakaibangon manen dagiti nadadael a balay

 Nakigtot ti maysa a pamilia idi naammuanda nga awanen ti amin a kukuada, a pakairamanan ti balay ken negosioda. Awanen ti pagbiagda. Sumagmamano nga aldaw kalpasanna, kasla saanda a kaya a kitaen ti bakante a lote a nakaipatakderan idi ti balayda. Ngem idi maibangbangon manen, in-inut a simmayaat ti riknada. Nakatulong kadakuada ti ayat ken panangipateg dagiti boluntario tapno makabangonda manen. Gapu iti dayta, natignay ti pamilia nga agboluntario met a tumulong a mangibangon iti balay ti maysa a brother.

 Maparparegta ti adu a kakabsat iti trabahotayo a panangsaranay. Imbaga ti maysa a brother: “Talaga a nagsayaat ti probision ni Jehova a Disaster Relief Committee. Maysa nga aldaw laeng kalpasan ti didigra, addadan a dagus iti lugar a nakapasamakan ti didigra tapno mangipaay kadagiti kasapulan dagiti kakabsat. No mabasbasam ti trabaho a panangsaranay iti sabali a paset ti lubong, maparparegtakan. Ngem sabali laeng a talaga no sikan a mismo ti makapadas. Mas maapresiarmo ti organisasion. Makitam met no kasano a tultuladen dagiti kakabsat dagiti kualidad ni Jehova ken no kasano a sigsiguraduenda a maipaay dagiti material, espiritual, ken emosional a kasapulantayo. Napadasanmi a mismo ti ayat ni Jehova.”

 Bayat nga umas-asideg ti panungpalan daytoy a sistema, agtultuloy nga umadu dagiti didigra. (Lucas 21:10, 11) Ngem us-usaren ti naayat nga Aritayo a ni Jesu-Kristo ti kongregasion tapno ipakitana nga adda isuna kadatayo iti “amin nga al-aldaw agingga iti panungpalan daytoy a sistema ti bambanag.” (Mateo 28:20) Gapu iti nabuslon a donasionyo para iti sangalubongan a trabaho, babaen ti donate.pr418.com ken iti dadduma pay a pamay-an, ken iti panangipaayyo iti tiempo ken pigsayo, ipakpakitayo a supsuportaranyo ti Pagarian ken ti naayat nga Aritayo. Agyamyamankami unay iti agtultuloy a kinaparaburyo.