Dagiti Saksi ni Jehova ket mangar-aramid kadagiti narelihiosuan nga aktibidad ken tumultulongda kadagiti tattao iti nasurok a 200 a nasion. Ngem agarup 35 laeng kadagita a nasion ti makaaw-awat iti donasion manipud iti lugarda nga umanay a pagbayadda kadagiti paggastosanda. Komusta ngay dagiti napanglaw a nasion? Pangal-alaanda iti pondoda para kadagiti paggastuanda?

 Ad-adalen ti Bagi a Manarawidwid dagiti Saksi ni Jehova dagiti naespirituan a kasapulan ken aktibidad dagiti padada a Saksi iti intero a lubong. Maibadbadyet a naimbag dagiti pondo tapno mausar iti umiso a pamay-an. No agsobra ti pondo ti maysa a sangay para kadagiti naespirituan nga aktibidadda, maited ti sobra a pondo kadagiti nasion a kurang ti pondoda. Daytoy nga urnos ket kas met laeng iti inaramid dagiti nagkauna a Kristiano, a nagtitinnulongda “tapno adda panagpapada.” (2 Corinto 8:14) Inusarda dagiti sobrada tapno mapunnuan ti pagkurangan ti dadduma a Kristiano.

 Ania ti narikna dagiti kakabsat nga immawat iti pondo a sobra ti dadduma a sangay? Kas pagarigan, idiay Tanzania, nasurok a kagudua iti populasionna ti agbibiag iti awan pay 100 a pisos iti kada aldaw. Inusarda ti naawatda a pondo a nang-renovate iti Kingdom Hall nga us-usaren ti Mafinga a kongregasion. Insurat dagiti kakabsat iti dayta a kongregasion: “Manipud idi na-renovate ti Kingdom Hall-mi, nakaad-adun ti makigimgimong! Agyamyamankami unay iti kinaparabur ti organisasion ni Jehova ken dagiti kakabsat iti intero a lubong. Nakaragragsakkami ta addan nagpintas a lugar a pagdaydayawanmi.”

 Agkurkurang ti makan ti dadduma a kakabsat idiay Sri Lanka gapu iti COVID-19 pandemic. Maysa kadakuada ni Imara Fernando ken ti ubing pay nga anakna a ni Enosh. Gapu iti donasion manipud kadagiti sabali a lugar, naawatda ti kasapulanda a relief. Kastoy ti insuratda iti inaramidda a card: “Agyamyamankami iti ayat dagiti kakabsat bayat kadagitoy narigat a tiempo. Nakaragragsakkami ta pasetnakami daytoy a pamilia. Kanayon nga ikarkararagmi a tulongan ni Jehova ti amin a kakabsat bayat ti maudi nga al-aldaw.”

 Sadinoman ti paggigianan dagiti kakabsat, mangmangtedda iti adda kadakuada. Kas pagarigan, nangaramid ni Enosh iti bassit a contribution box tapno makaited met iti donasion ket matulongan dagiti agkasapulan a pamilia. Kasta met a kinaparabur ti ipakpakita ni Guadalupe Álvarez. Aggigian iti maysa nga estado ti Mexico a manmano ti adda regular a pagsapulanna wenno agsuelsueldo iti minimum. Ngem mangmangted iti donasion sigun iti kayana nga ited. Insuratna: “Agyamyamanak ken Jehova gapu iti kinaimbag ken napudno nga ayatna. Ammok a mainayon ti donasionko iti donasion ti dadduma ket mausar a pangtulong kadagiti kakabsat nga agkasapulan.”

 Maragragsakan dagiti sanga nga opisina a mangmangted iti kuarta kadagiti agkasapulan a sangay. “Adu a tawen a kasapulanmi ti pinansial a tulong ti dadduma a nasion tapno agtaray dagiti naespirituan nga aktibidad iti nasionmi,” kuna ni Anthony Carvalho, nga agserserbi iti Komite ti Sangay ti Brazil. “Gapu iti dayta a suporta, nakadakdakkel ti panagrang-ay. Ngem simmayaat itan ti situasionmi iti pinansial isu a pribilehiomi metten ti tumulong iti dadduma. Ammo dagiti kakabsat a sangalubongan ti trabaho a panangasaba isu a kitkitaenda no kasanoda a makatulong kas managsakripisio nga adalan ni Jesus.”

 Kasano a supsuportaran dagiti Saksi ni Jehova dagiti kakabsatda nga agkasapulan? Saan a kasapulan a direkta nga agipatulodda iti kuarta kadagiti sanga nga opisina iti dadduma a nasion. Mangipaayda laeng iti kontribusion para iti sangalubongan a trabaho. Itinnagda dayta iti contribution box iti kongregasion a namarkaan iti “Worldwide Work” wenno babaen ti donate.pr418.com. Maapresiar unay ti amin a maited a donasion.