Idi naibalud da Pablo ken Silas, indaydayawda ti Dios babaen iti kanta. (Ara 16:25) Nagkankanta met kadagiti kanta ti Pagarian dagiti kapammatiantayo a naipan idiay Siberia ken dagiti kakabsat a naibalud iti Sachsenhausen concentration camp idiay Germany bayat ti turay ti Nazi. Ipakita dagitoy a kapadasan ti bileg dagiti kanta a mangpatured kadagiti Kristiano a masubsubok.

Dandanin mairuar ti baro a pagkantaan a napauluan iti “Sing Out Joyfully” to Jehovah iti adu a dadduma pay a lengguahe. Inton maaddaantayon iti kopia, mabalintayo nga ikabesa dagiti liriko babaen ti panangpraktistayo kadagita bayat ti panagdaydayaw ti pamilia. (Efe 5:19) Ket inton maipasangotayo iti pannubok, makatulong ti nasantuan nga espiritu tapno malagiptayo dagita. Makatulong dagiti kanta ti Pagarian tapno maipokustayo ti panunottayo iti namnamatayo. Mangted dagita iti inspirasion no maipasangotayo iti pannubok. Ket no naragsaktayo, dagiti makapabileg a liriko ti mangtignay kadatayo a ‘mangpataud iti uni ti panagrag-o’ gapu iti nasayaat a kasasaad ti pusotayo. (1Cr 15:16; Sal 33:1-3) Gundawayantayo koma ngarud dagiti nasayaat a maipaay dagiti kanta ti Pagarian!

BUYAEN TI VIDEO A MAYSA A KANTA A NANGTED INSPIRASION KADAGITI TRABAHADOR, SA SUNGBATAN DAGITOY A SALUDSOD:

• Ania dagiti kasasaad a nangtignay ken Kabsat Frost a mangputar iti kanta?

• Kasano a dayta a kanta ti nagbalin nga inspirasion dagiti kakabsat iti Sachsenhausen concentration camp?

• Ania dagiti inaldaw a situasion a mapabilegdaka dagiti kanta ti Pagarian?

• Ania dagiti kanta ti Pagarian a kayatmo nga ikabesa?