Imbilin ni Jesus kadagiti pasurotna nga agaramidda kadagiti adalan. (Mt 28:19) Ramanen daytoy ti panangasaba ken panangisuro. Sagpaminsan nga isaludsodtayo iti bagitayo, ‘Kasanok a mapasayaat ti abilidadko kadagitoy a napateg nga aspeto ti trabaho a panagaramid iti adalan?’

Imbes nga urayentayo nga umasideg dagiti tattao, masapul a nagagettayo a mangbirok kadagiti “maikari.” (Mt 10:11) No makiramantayo iti ministerio, nasiputtayo kadi kadagiti gundaway a makisarita kadagiti tattao a ‘nairana nga adda’? (Ara 17:17) Nagbalin nga adalan ni Lidia gapu iti kinagaget ni apostol Pablo a mangasaba.​—Ara 16:13-15.

BUYAEN TI VIDEO A MANGASABAKAYO NGA ‘AWAN SARDAYNA’​—ITI DI PORMAL KEN ITI BINALAYBALAY, SA SUNGBATAN DAGITOY A SALUDSOD:

• Kasano nga impakita ni Samuel nga aktibo nga agimula iti bukel ti kinapudno iti inaldaw a rutinana?

• Apay a masapul a nagagettayo a makipaset iti amin a kita ti panangasaba?

• Siasino dagiti mabalinmo a pangikasabaan iti mensahe ti Pagarian iti inaldaw a rutinam?

Tapno makaaramidtayo kadagiti adalan, saantayo laeng a basta mangted iti literatura kadagiti tattao. Tapno matulongantayo ida a rumang-ay iti naespirituan, masapul a sarungkaran ken iyadalantayo ida iti Biblia. (1Co 3:6-9) Ngem kasano no awan unay ti nasayaat a resulta ti panangikagumaantayo a mangisuro iti maysa a tao iti kinapudno maipapan iti Pagarian? (Mt 13:19-22) Masapul nga itultuloytayo ti agbirok kadagiti tattao a ti pusoda ket kas iti “nasayaat a daga.”​—Mt 13:23; Ara 13:48.

BUYAEN TI VIDEO A MANGASABAKAYO NGA ‘AWAN SARDAYNA’​—ITI PUBLIKO A LUGAR KEN PANAGARAMID KADAGITI ADALAN, SA SUNGBATAN DAGITOY A SALUDSOD:

• Kasano a sinibugan da Solomon ken Mary ti bukel ti kinapudno a naimula iti puso da Ezekiel ken Abigail?

• Ania koma ti kalattayo no makipasettayo iti amin nga aspeto ti ministerio, a pakairamanan ti panangasaba iti publiko?

• Kasanotayo a maipangpangruna ti panangisuro iti kinapudno iti sabsabali?