Mangrugi ita a tawen, ad-adun ti tiempotayo nga agsagana para iti Pananglaglagip iti ipapatay ni Kristo. No ti Memorial ket maangay iti tengnga ti lawas, awan ti Gimong a Panagbiag ken Ministerio iti dayta a lawas. No ti Memorial ket maangay iti ngudo ti lawas, awan ti palawag publiko ken ti Panagadal iti Pagwanawanan. Usaremto kadi iti kasayaatan a pamay-an dagita nga oras a mainayon iti eskediulmo? Kas idi umuna a siglo, masapul nga adda dagiti praktikal nga urnos para iti daytoy nga espesial nga okasion. (Lu 22:7-13; km 3/15 1) Ngem masapul nga isagana ti tunggal maysa kadatayo ti pusotayo. Kasano?

• Panunotem ti kinapateg ti iyaatendermo.​—1Co 11:23-26

• Ikararagmo ken panunotem ti personal a relasionmo ken Jehova.​—1Co 11:27-29; 2Co 13:5

• Basaem ken panunotem a naimbag dagiti naibatay iti Biblia a material a mangilawlawag iti kaipapanan ti Memorial.​—Jn 3:16; 15:13

Basbasaen ken pampanunoten a naimbag ti dadduma a kakabsat ti nayeskediul a panagbasa iti Biblia iti Memorial a makita iti Panangsukimat iti Kasuratan iti Inaldaw. Basbasaen met ti dadduma dagiti bersikulo ti Biblia a makita iti tsart iti baba. Adda met dagiti mangrepaso kadagiti artikulo ti Pagwanawanan maipapan iti Memorial ken iti ayat nga impakita kadatayo ni Jehova ken ni Jesus. Aniaman ti adalem, dayta koma ti lalo a mangpasinged kenka ken Jehova ken iti Anakna.