Insakripisio ni Jesus ti biagna para kadagiti imperpekto a tattao. (Ro 5:8) Awan duadua nga ap-apresiarentayo ti impakita ni Jesus nga ayat babaen ti panangipaayna iti biagna kadatayo. Nupay kasta, masapul a laglagipentayo a natay met ni Kristo para iti kabsattayo. Kasano a maipakitatayo ti ayat a kas ken Kristo kadagiti kakabsattayo nga imperpekto a kas kadatayo? Kitaentayo ti tallo a pamay-an. Umuna, mabalintayo a paaduen ti gagayyemtayo, a pakairamanan dagiti naiduma ti kasasaadna iti biag. (Ro 15:7; 2Co 6:12, 13) Maikadua, agannadtayo tapno saantayo a makaibaga wenno makaaramid iti makapasakit iti dadduma. (Ro 14:13-15) Maikatlo, no adda nakabasol kadatayo, pakawanentayo koma a dagus. (Lu 17:3, 4; 23:34) No ikagumaantayo a tuladen ni Jesus kadagitoy a banag, itultuloy a bendisionan ni Jehova ti kongregasion iti talna ken panagkaykaysa.

BUYAEN TI VIDEO NGA AGBALIN A NASAYSAYAAT A KRISTIANO! SA SUNGBATAN DAGITI SUMARUNO A SALUDSOD:

• Ania ti panangmatmat idi ni Miki iti kongregasionna?

• Ania ti nangbalbaliw iti panangmatmatna?

• Kasano a nakatulong ken Miki ti ulidan ni Jesus a mangbalbaliw iti panangmatmatna? (Mr 14:38)

• Kasano a makatulong ti Proverbio 19:11 tapno positibo ti panangmatmattayo kadagiti padatayo a Kristiano?