Ti panangilaksid protektaranna ti kongregasion ken pangdisiplina kadagiti saan nga agbabbabawi a nakabasol. (1Co 5:6, 11) No suportarantayo dayta a panangdisiplina ni Jehova, ipakpakitatayo ti ayat. Kasano a kasta idinto ta ti panangilaksid ket mangyeg iti saem kadagiti amin a nairaman kas kadagiti kapamilia ken ti hudisial a komite?

Kangrunaanna, ipakpakitatayo a napateg kadatayo ti reputasion ni Jehova ken ti pagalagadanna iti kinanasantuan. (1Pe 1:14-16) Ipakpakitatayo met nga ay-ayatentayo ti nailaksid. Uray nasakit ti nadagsen a disiplina, mangpataud dayta iti “talna a bunga ti kinalinteg.” (Heb 12:5, 6, 11) Makibibiangtayo iti panangdisiplina ni Jehova no kalangentayo dagiti nailaksid wenno dagiti nangisina iti bagbagida. Tandaanantayo a disiplinaen ni Jehova dagiti adipenna “iti maitutop a pamay-an.” (Jer 30:11) Bayat a supsuportarantayo ti panangdisiplina ni Jehova ken pagtalinaedentayo a natibker ti espiritualidadtayo, agtultuloy a mangnamnamatayo nga agsubli ti nadisiplina iti naasi nga Amatayo.—Isa 1:16-18; 55:7.

BUYAEN TI VIDEO NGA AGTALINAED A MATALEK NGA ADDAAN ITI NAGKAYKAYSA A PUSO, SA SUNGBATAN DAGITOY:

• Kasano kasakit kadagiti Kristiano a nagannak no panawan ti anakda ni Jehova?

• Kasano a matulongan ti kongregasion dagiti matalek a miembro ti pamilia?

• Ania a salaysay iti Biblia ti mangipakita a napatpateg koma ti kinamatalektayo ken Jehova ngem iti kinamatalektayo iti pamiliatayo?

• Kasanotayo a maipakita a napatpateg ti kinamatalektayo ken Jehova ngem iti kinamatalektayo iti pamiliatayo?