Iti lubong ita, maibilbilang a naimbag ti dakes ken dakes ti naimbag. (Isa 5:20) Makapaladingit ta ar-aramiden ti dadduma dagiti kagura ni Jehova, agraman dagiti saan a nasayaat nga aramid ti agpada a lalaki wenno agpada a babai. Dagiti kaeskuelaan ken dadduma pay, im-impluensiaanda dagiti ipatpategtayo nga ubbing a mangaramid kadagiti ar-aramidenda. Kasanoyo a maisagana dagiti annakyo a mangsango iti dayta ken iti dadduma pay a situasion?

Isuroyo kadagiti annakyo dagiti bilin ni Jehova. (Le 18:3) In-inut nga isuroyo kadakuada dagiti ibagbaga ti Biblia maipapan iti seks a maibagay iti edadda. (De 6:7) Isaludsodyo iti bagiyo: ‘Insurok kadi kadagiti annakko no ania ti umiso a panangipakita iti kinadungngo, no apay a napateg ti naemma a panagbadbado, ken no apay a kasapulan a respetuen ti dadduma ti privacy-da? Ammo kadi dagiti annakko ti aramidenda no adda mangipakita kadakuada iti pornograpia wenno adda mangipaaramid kadakuada iti banag nga ibaga ni Jehova a dakes?’ No naisuro dagita kadakuada, maliklikanda ti adu a problema. (Pr 27:12; Ec 7:12) Ipakpakitayo nga ay-ayatenyo dagiti nagpateg a tawidyo ken Jehova no isuroyo dagiti annakyo.—Sal 127:3.

BUYAEN TI VIDEO A MANGIBANGON ITI NALAGDA A BALAY—SALAKNIBANYO DAGITI ANNAKYO MANIPUD ITI “DAKES,” SA SUNGBATAN DAGITOY:

• Apay a marigatan ti dadduma a mangisuro kadagiti annakda maipapan iti seks?

• Apay a masapul a sanayen dagiti nagannak dagiti annakda iti “disiplina ken pammagbaga ni Jehova”?—Efe 6:4

• Ania dagiti impaay ti organisasion ni Jehova a tumulong kadagiti nagannak a mangisuro kadagiti annakda maipapan iti seks?—w19.05 12, kahon

• Apay a masapul a kanayon a makisaritakayo kadagiti annakyo uray awan pay dagiti problema?