Kada tawen, padpadaanan ti ili ni Jehova ti agkakadua a mangselebrar iti Memorial. Iti lawlawas sakbay ken kalpasan ti Memorial, gundawayantayo ti amin nga oportunidad a mangidaydayaw ken agyaman ken Jehova gapu iti sagutna a subbot. (Efe 1:3, 7) Kas pagarigan, ikagkagumaantayo nga awisen ti dadduma nga umatender iti Memorial. Mangar-aramid ti dadduma iti panagbalbaliw tapno makapag-auxiliary pioneer-da nga addaan iti kalat a 30 wenno 50 nga oras bayat dagiti bulan ti Marso wenno Abril. Kayatmo kadi a nayonan ti oras nga us-usarem iti ministerio bayat daytoy a tiempo ti Memorial? Ania ti makatulong kenka?

Masansan nga ad-adu ti maaramidantayo no nasaksakbay nga agplanotayo. (Pr 21:5) Gapu ta umas-asidegen ti tiempo ti Memorial, agplanotayo itan. Panunotem no kasano a mapalawam ti ministeriom bayat ti tiempo ti Memorial, ken dagiti aramidem tapno maragpatmo dagiti kalatmo. Kalpasanna, kiddawem ken Jehova a bendisionanna dagiti panagreggetmo.​—1Jn 5:14, 15.

Adda kadi mapanunotmo a pamay-an tapno mapalawam ti ministeriom bayat ti tiempo ti Memorial?