Bayat ti Septiembre, agtitinnulongtayo a mangawis iti amin a makasaritatayo nga agadal iti Biblia babaen ti broshur nga Agbiagka a Naragsak iti Agnanayon! Mabalin a pilien dagiti agibumbunannag ti ag-auxiliary pioneer a 30 nga oras laeng ti abutenda. Kasanotayo a makipaset iti daytoy nga espesial a kampania?

• Iti Damo a Pannakisarita: Usarem ti likud ti broshur tapno maalam ti interes dagiti tattao, sa ipakitam no kasano ti panagadal. Laglagipem dagidiay dati a nangipakita iti interes, a pakairamanan dagiti sarsarungkaram. Uray saanda idi a kayat ti agadal iti Biblia, mabalin nga aginteresda iti baro a pamay-an ti panangyadaltayo ken iti baro a broshur. Saanka a mangibatbati iti broshur kadagiti balay nga awan ti taona wenno mangiragpin iti dayta no suratam dagiti dati a saan a nangipakita iti interes. Mabalin a mangyurnos ti Komite ti Serbisio ti Kongregasion kadagiti kanayonan a panagtataripnong sakbay ti panangasaba bayat dayta a bulan.

• Dadduma pay nga oportunidad: No agus-usar ti kongregasionyo kadagiti literature cart, idispleyyo ti broshur nga Agbiagka a Naragsak iti Agnanayon! Ibagayo kadagidiay interesado a mangbasa iti broshur a mabalinda met ti libre nga agadal iti Biblia. Ipakitayo biit no kasano ti agadal, wenno iyurnosyo nga aramiden dayta iti sumaruno a gundaway. Mabalin nga iyurnos ti manangaywan iti serbisio a mapan dagiti kualipikado nga agibumbunannag kadagiti lugar ti negosio nga adda iti teritoriayo tapno iyawisda ti panagadal iti Biblia. Mabalinyo met nga iyawis ti panagadal iti Biblia kadagiti katrabahuanyo wenno kadagiti makasabaanyo iti di pormal a pamay-an.

Imbilin ni Jesus a ‘pagbalinentayo nga adalan dagiti tattao,’ ken ‘isurotayo ida.’ (Mt 28:19, 20) Sapay koma ta matulongannatayo daytoy nga espesial a kampania a mangitungpal iti daytoy a panggeptayo, nga usarentayo ti Agbiagka a Naragsak iti Agnanayon!