Ti Memorial ipaayannatayo iti nagsayaat a gundaway a mangutob kadagiti bendision iti masanguanan a nagbalin a posible gapu iti subbot, kas iti panagungar. Saan a pulos pinanggep ni Jehova a matay dagiti tattao. Dayta ti rason a ti panagladingit gapu iti ipapatay ti patpatgen iti biag ti maysa kadagiti kasaeman a mapasarantayo. (1Co 15:26) Nasaktan ni Jesus idi nakitana dagiti adalanna nga agladladingit gapu iti ipapatay ni Lazaro. (Jn 11:33-35) Yantangay ni Jesus ti perpekto a ladawan ti Amana, masiguradotayo a masaksaktan met ni Jehova a makakita kadatayo nga agladladingit gapu iti ipapatay dagiti patpatgentayo iti biag. (Jn 14:7) Magagaran ni Jehova a mangpadpadaan iti tiempo a panangpagungarna kadagiti adipenna, ket kastatayo met.—Job 14:14, 15.

Yantangay ni Jehova ket Dios ti urnos, nainkalintegan laeng a patien a naurnosto ti pannakaaramid ti panagungar. (1Co 14:33, 40) Imbes a pumpon, mabalin nga addanto urnos a panangsabat kadagiti mapagungar. Ut-utobenyo kadi ti panagungar, aglalo no panawen ti panagladingit? (2Co 4:17, 18) Agyamyamankayo kadi ken Jehova iti panangipaayna iti subbot ken iti panangipalgakna iti Kasuratan nga agbiagto manen dagiti natay?—Col 3:15.

• Asino kadagiti gagayyem ken kakabagiam ti il-iliwem a makitanto manen?

• Asino a karakter iti Biblia ti nangnangruna a kayatmo a maam-ammo ken makasarita?