Nadisenio ti broshur nga Umimdengka iti Dios ket Agbiagka nga Agnanayon tapno maisuro dagiti kangrunaan a kinapudno iti Biblia babaen kadagiti ladawan kadagidiay marigatan a mangtarus iti naisurat nga impormasion. Mabalin nga usaren daytoy dagiti mayad-adalan a saan unay a makabasa. Iti kaaduan a panid, adda kahon a naglaon iti kanayonan nga impormasion a mabalin a mapagsaritaan depende iti abilidad ti mayad-adalan.

Mabalinyo nga itukon ti broshur uray no saan a dayta ti tukon iti bulan. No mangyad-adalkayo iti Biblia, usarenyo dagiti ladawan a mangilawlawag iti salaysay ti Biblia. Agsaludsodkayo tapno mairaman ti iyad-adalanyo iti saritaan ken tapno masiguradoyo a naawatanna. Basaen ken pagsaritaanyo ti teksto iti baba ti tunggal panid. No malpasyon nga adalen ti broshur, adalenyo ti Ania a Talaga ti Isursuro ti Biblia? tapno matulonganyo ti iyad-adalanyo a rumang-ay nga agturong iti bautismo.