Saanen nga obligado dagiti Kristiano a mangtungpal iti Mosaiko a Linteg. Ngem kidkiddawen latta ni Jehova a tungpalentayo ti dua a kadakkelan a bilin iti dayta​—ti panangayat iti Dios ken iti kaarruba. (Mt 22:37-39) Saan a matawid dayta a kita ti ayat. Masapul a mapatanor. Kasano? Ti inaldaw a panagbasa iti Biblia ti maysa a napateg a pamay-an. No adalentayo dagiti nagduduma nga aspeto ti personalidad ti Dios a naipalgak iti Kasuratan, makitatayo a ‘makaay-ayo ni Jehova.’ (Sal 27:4) Kas resultana, dumakkel ti ayattayo kenkuana ken ad-adda a matuladtayo ti panagpampanunotna. Dayta ti mangtignay kadatayo nga agtulnog kadagiti bilin ti Dios, agraman ti bilinna nga ipakita ti managsakripisio nga ayat iti sabsabali. (Jn 13:34, 35; 1Jn 5:3) Dagitoy ti tallo a singasing tapno makaparagsak ti panagbasa iti Biblia:

• Usarem ti imahinasionmo, ken dagiti sentidom. Panunotem nga addaka iti eksena. Ania ti makitkitam, mangmangngegmo, ken maang-angotmo? Ania ti marikrikna dagiti adda iti eksena?

• Baliwbaliwam ti pamay-am. Dagitoy ti mabalin nga aramidem: Agbasa iti napigsa, wenno surotem ti pannakaibasa ti audio recording. Mangbasa iti maipapan iti maysa a karakter ti Biblia wenno topiko imbes nga agsasaruno a basaen dagiti kapitulo. Kas pagarigan, no basaem ti maipapan ken Jesus, usarem ti Giya iti Panagadal iti Sao ti Dios, Seksion 4 wenno 16. Basaem ti intero a kapitulo a nakaalaan ti inaldaw a teksto. Basaem dagiti libro ti Biblia sigun iti agsasaruno a pannakaisuratda.

• Tarusam ti basbasaem. Adayo a nasaysayaat ti mangbasa iti maysa a kapitulo sa tarusam ken utobem dayta, ngem ti mangbasa iti adu a kapitulo tapno laeng makuna a nabasam dagita. Panunotem ti situasion. Analisarem dagiti detalye. Agusarka kadagiti mapa ken marginal reference. Sukimatem ti uray maysa laeng a punto a saanmo a maawatan. No posible, no kasano kaadu ti tiempom nga agbasa, kasta met ti kaadu ti tiempom nga agutob.