Adda uppat a video-tayo iti panangyadal iti Biblia a mabalintayo nga usaren iti ministerio. Ania ti nakairantaan ti tunggal maysa kadagita?

• Ti Apay nga Adalem ti Biblia?​—At-attiddog a Bersion ket nadisenio a mangtulong kadagiti tattao nga aginteres iti Biblia aniaman ti relihionda. Paregtaenna dagiti agbuybuya a mangammo iti sungbat ti Biblia kadagiti nagpapateg a saludsod iti biag ken mangted iti pagarigan kadagiti lohikal a sungbat. Ilawlawagna met no kasano ti ag-request iti panagadal iti Biblia.

• Ti Apay nga Adalem ti Biblia? (ab-ababa a bersion) ket kapada ti at-atiddog a bersion ngem nasurok laeng a maysa a minuto ti kapautna. Mabalin a mas epektibo daytoy kadagiti teritoria nga agap-apura dagiti tattao.

• Ti Kasano ti Panagadal iti Biblia? ket nadisenio tapno aginteres nga agpayadal iti Biblia ti maysa ken sungbatanna ti dadduma a gagangay a saludsod maipapan iti panagadal, kas iti no kasano ti ag-request iti dayta.

• Ti Welcome iti Panagadalmo iti Biblia ket nadisenio a maipabuya kadagiti iyad-adalan iti Biblia. Nupay nayam-ammo ti video iti panid 2 iti libro nga Agbiagka a Naragsak iti Agnanayon!, mabalinmon nga ipabuya dayta uray no ti broshur pay laeng ti ad-adalenyo. Ipakita ti video dagiti linaon ti libro ken dagiti ekspektaren ti mayad-adalan bayat ti panagadal.

Nupay adda espesipiko a nakairantaan ti tunggal video, mabalin nga ipabuya wenno ipatulod ti aniaman kadagita no maitutop. Maiparegta kadagiti agibumbunannag nga agbalin a pamiliar ken usarenda a naimbag dagita iti ministerio.