PANAGBIAG KAS KRISTIANO
No Kasano ti Tumulong Kalpasan ti Didigra
Umadu nga umadu ti didigra iti kaaldawantayo. No adda mapasamak a didigra, masapul ti kinaorganisado ken panagtitinnulong tapno maipaay ti kasapulan a saranay. Gapu iti dayta, imbilin ti Bagi a Manarawidwid a mabukel ti maysa a Disaster Relief Department iti tunggal sanga nga opisina.
No maammuan dagiti kakabsat iti dayta a departamento nga adda napasamak a didigra, dagus a kontakenda dagiti panglakayen iti dayta a lugar tapno maammuanda no ania a tulong ti kasapulan dagiti kakabsat. No saan a kaya dagiti kakabsat a tarimaanen dagiti naperdi, mangpili ti sangay kadagiti kualipikado a brother a mangidaulo iti trabaho a panangsaranay. Mabalin nga agkiddaw dagitoy a brother kadagiti boluntario wenno espesipiko a banag a maidonar, wenno mabalin a gumatangda kadagiti kasapulan a suplay sa iwarasda dagita.
Adu ti pagsayaatan ti kastoy nga urnos. Maliklikan ti pannakaulit ti bambanag, pannakariro, ken pannakasayang dagiti pondo ken materiales, a dagita ti mapasamak no agtignay dagiti kakabsat a bukbukodda.
Dagiti brother nga inapointaran ti sangay tantiaenda ti kaadu ti pondo ken dagiti boluntario a kasapulan iti trabaho a panangsaranay. Mabalinda met a kontaken dagiti lokal nga opisial, a masansan a makatulong tapno naparpartak ti panangsaranay. Isu a saan koma nga agkolekta lattan ti asinoman kadagiti pondo, agipatulod kadagiti relief supply, wenno agbiahe kadagiti apektado a lugar malaksid no naibaga kadakuada.
Ngem siempre, kayattayo ti tumulong no adda didigra. (Heb 13:16) Ay-ayatentayo dagiti kakabsattayo! Ania ti mabalintayo nga aramiden? Kapatgan iti amin, ikararagantayo dagiti biktima ti didigra ken dagidiay tumultulong kadakuada. Mabalintayo met ti agdonar para iti sangalubongan a trabaho. Iti panangiwanwan ti Bagi a Manarawidwid, dagiti sanga nga opisina ti makaammo iti kasayaatan a pangusaran kadagiti pondo. Ket no kayattayo ti personal a tumulong, mabalintayo ti ag-fill out iti form a Local Design/Construction Volunteer Application (DC-50).
BUYAEN TI VIDEO A NAKARO A LAYUS IDIAY BRAZIL, SA SUNGBATAN DAYTOY:
Ania ti naapresiarmo iti panangsaranay dagiti Saksi ni Jehova kalpasan ti layus idiay Brazil idi 2020?