Kalikaguman idi ti Mosaiko a Linteg a mangisagana iti legal a kasuratan ti maysa a lalaki a mayat a makidiborsio. Nakatulong daytoy tapno saan nga isina lattan ti maysa ti asawana. Ngem idi kaaldawan ni Jesus, pinagbalin dagiti lider ti relihion a nalaka ti panagdiborsio. Mabalin nga idiborsio ti lalaki ti asawana aniaman ti makagapu. (“certificate of dismissal” study note iti Mr 10:4, nwtsty; “divorces his wife,” “commits adultery against her” study note iti Mr 10:11, nwtsty) Imbaga ni Jesus a ti panagasawa ket inanamongan ken inrugi ni Jehova. (Marcos 10:2-12) Ti asawa a lalaki ken babai ket agbalin a ‘maymaysa a lasag’ ken permanente ti panagtiponda. Ti kakaisuna a Nainkasuratan a pakaibatayan ti diborsio, sigun iti kapadana a salaysay iti Mateo, ket “pannakiabig.”​—Mt 19:9.

Adu ita ti saan a kas ken Jesus ti panangmatmatda iti panagasawa, no di ket kas kadagiti Fariseo. No adda problema, nagalisto nga agdiborsio dagiti tattao iti lubong. Iti sabali a bangir, saan a tagtagilag-anen dagiti Kristiano a pagassawaan ti karida idi nagkasarda ken ikagkagumaanda a solbaren dagiti problema babaen ti panangyaplikarda kadagiti prinsipio ti Biblia. Kalpasan a mabuya ti video a Ti Ayat ken Respeto Pagkaykaysaenna Dagiti Pamilia, sungbatan dagitoy a saludsod:

• Kasano a mayaplikaryo ti Proverbio 15:1 iti panagasawayo, ken apay a napateg dayta?

• Kasano a maliklikan dagiti problema no mayaplikar ti Proverbio 19:11?

• No nakaron ti problemayo kas agassawa, imbes a panunotenyo, ‘Rumbeng kadi a makidiborsioak?’ ania dagiti saludsod a masapul a panunotenyo?

• Kasanoka nga agbalin a nasaysayaat nga asawa babaen ti panangyaplikarmo iti Mateo 7:12?