NO APAY A NAPATEG: No ti pampanunot “ti maysa a tao ket kas iti adalem a dandanum,” dagiti met saludsod ket kas iti timba a mangaon kadagita. (Pr 20:5) Tulongannatayo ti panagsaludsod tapno mairaman iti saritaan ti dumdumngeg. Masansan a makatulong dagiti sungbat kadagiti napili a naimbag a saludsod tapno maibagaytayo ti ibagatayo. Nalaing nga agusar ni Jesus iti saludsod. Kasano a matuladtayo?

NO KASANO NGA ARAMIDEN:

• Agusar iti saludsod a mangadaw iti kapanunotan. Nagusar ni Jesus kadagiti agsasaruno a saludsod tapno maammuanna ti kapanunotan dagiti adalanna. (Mt 16:13-16; be 238 ¶3-5) Ania dagiti mabalinmo nga usaren a saludsod a mangadaw iti kapanunotan?

• Agusar iti saludsod a mangiturong iti punto. Tapno mailinteg ti kapanunotan ni Pedro, nagsaludsod ni Jesus ken nangipaay kadagiti posible a sungbat a mangiturong ken Pedro iti umiso a konklusion. (Mt 17:24-26) Ania dagiti saludsod a mabalinmo nga usaren tapno makagteng ti maysa iti umiso a konklusion?

• Komendaram ti kasarsaritam. Kinomendaran ni Jesus ti maysa nga eskriba idi “simmungbat a sisasaririt.” (Mr 12:34) Kasano a mabalin a komendaram ti maysa no nasayaat ti sungbatna iti saludsod?

BUYAENYO TI UMUNA A PASET TI VIDEO NGA ARAMIDENYO TI TRABAHO NGA INARAMID NI JESUS—PANANGISURO, SA SUNGBATAN DAGITOY A SALUDSOD:

• Apay a saan a nasayaat daytoy a pamay-an ti panangisuro, uray umiso met dagiti impormasion?

• Apay a saantayo koma a basta ilawlawag laeng dagiti impormasion?

BUYAENYO TI MAIKADUA A PASET TI VIDEO SA SUNGBATAN DAGITOY A SALUDSOD:

• Kasano a nagusar ti kabsat kadagiti epektibo a saludsod?

• Ania pay dagiti aspeto ti panangisurona ti matuladtayo?