Kasano kabayagen nga ur-urayem ti iyaay ti Pagarian ti Dios? Siaanus kadi nga agur-urayka iti laksid ti pakarigatan? (Ro 8:25) Adda dagiti Kristiano a magurgura, mamalmaltrato, maibalbalud, wenno mapangpangtaan pay ketdi ti biagda. Adu met dagiti agsagsagaba gapu iti nakaro a sakit wenno kinalakay ken kinabaket.

Ania ti makatulong kadatayo a sigagagar nga aguray aniaman ti pakasuotantayo? Masapul a patibkerentayo ti pammatitayo babaen ti inaldaw a panagbasa iti Biblia ken panagutob. Masapul nga agpokustayo iti namnamatayo. (2Co 4:16-18; Heb 12:2) Masapul nga umararawtayo ken Jehova ken dumawattayo iti bileg ti nasantuan nga espirituna. (Lu 11:10, 13; Heb 5:7) Matulongannatayo ti naayat nga Amatayo tapno ‘siraragsak ken siaanus a makapagibturtayo.’​—Col 1:11.

BUYAEN TI VIDEO A MASAPUL NGA ‘AGTARAYTAYO BUYOGEN TI PANAGIBTUR’​—AGTALEK A MAGUN-OD TI GUNGGONA, SA SUNGBATAN DAGITOY A SALUDSOD:

• Ania dagiti “di ninamnama a pasamak” a mabalin a mapasamak kadatayo? (Ec 9:11)

• Kasano a makatulong ti kararag no masuottayo?

• No saanen a kas iti dati ti kaadu ti maar-aramidantayo nga agserbi ken Jehova, apay a masapul nga agpokustayo iti kabaelantayo pay nga aramiden?

• Ania ti tumulong kenka nga agtultuloy nga agtalek a mangawat iti gunggona?