Nakasabaan ni Jesus ti Samaritana iti di pormal gapu ta kinasaritana. Kasanotayo a maparang-ay ti abilidadtayo a mangirugi iti saritaan kadagiti estranghero?

• Agbalinka a mannakigayyem ken kasaritam dagiti tattao. Uray nabambannog ni Jesus, inrugina ti makisarita babaen ti panagkiddawna iti danum. Mabalinmo met ti mangrugi babaen ti maysa a kablaaw sa agkomentoka maipapan iti paniempo wenno maysa a nabiit pay a pasamak. Laglagipem a ti umuna a panggepmo ket tapno mairugi laeng ti saritaan, isu a makisaritaka iti aniaman a topiko a posible a paginteresan ti kasaritam. No saan a makisarita, awan mapukaw kenka. Makisaritaka manen iti sabali. Ikararagmo ken Jehova a paturedennaka.​—Ne 2:4; Ara 4:29.

• Siputam dagiti oportunidad a maikasabam ti naimbag a damag, ngem saanka nga agal-alisto. Bay-am nga agtultuloy ti saritaan. No agal-alistoka, baka alusiisen ti kasarsaritam ket isardengna ti makisarita. Dika maupay no nalpas ti saritaanyo a saanka man la a nakapangasaba. No maamakka a mangasaba iti di pormal, sanayem ti mangirugi iti saritaan nga awan ti panggepmo a mangasaba. [Ipabuya ken pagsasaritaan ti video 1.]

• Ikagumaam nga iserrek ti panangasaba babaen ti naimpusuan a panangibagam iti maipapan kadagiti patpatiem, a mabalin a mangtignay iti kasarsaritam nga agdamag iti ad-adu pay maipapan kadagita. Nangibaga ni Jesus kadagiti makapainteres a punto a nangtignay iti babai nga agsaludsod. Idi naiserreken ni Jesus ti naimbag a damag, sungsungbatanna laengen dagiti saludsod ti babai. [Ipabuya ken pagsasaritaan ti video 2, sa kalpa­sanna, ipabuya ken pagsasaritaan ti video 3.]