Resrespetuen ti organisasion dagiti Saksi ni Jehova (“narelihiosuan nga organisasion”) ti kalintegan ti tunggal indibidual iti kinapribado ken ti pannakaprotektar dagiti personal nga impormasion. Bigbigen ti organisasion ti kinapateg ti silulukat a komunikasion ken ti panangala kadagiti personal ken sensitibo nga impormasion tapno maipaay ti kasapulan ti tunggal Saksi ni Jehova ken maibanag dagiti narelihiosuan nga aktibidadda ken ti panangtulongda iti sabsabali. Bigbigenda met a napateg ti panangtaginayon iti kinakompidensial ken ti panangsigurado a maprotektaran a naimbag dagiti impormasion. (Proverbio 15:22; 25:9) Para kadagiti Saksi ni Jehova, nagpateg a banag ti kinakompidensial.—Proverbio 20:19.

Nangipaulog ti nagduduma a pagilian kadagiti linteg a mangprotektar kadagiti impormasion tapno masigurado a maprotektaran dagiti kalintegan dagiti indibidual mainaig iti kinapribado. Sakbay pay a naipaulog dagiti kasta a linteg, nabayagen a resrespetuen ti organisasion dagiti Saksi ni Jehova ti kalintegan mainaig iti kinapribado ken nabayagen nga ibilbilangda a nagpateg a banag ti kinakompidensial. Itultuloy a protektaran ti organisasion dagiti Saksi ni Jehova dagiti impormasion a naitalek kadakuada maitunos iti pamay-an a nabayagen nga ar-aramidenda, nga ita ket naisuraten iti daytoy a pagannurotan.

Dagiti Prinsipio iti Pannakaprotektar Dagiti Personal nga Impormasion. Sursuroten ti organisasion dagiti Saksi ni Jehova dagitoy a prinsipio iti panangusar ken panangprosesoda kadagiti personal nga impormasion:

1. Patas ken maitunos iti linteg ti pannakaproseso dagiti personal nga impormasion.

2. Maala, maproseso, ken mausar laeng dagiti personal nga impormasion para iti pannakaibanag dagiti aktibidad ti organisasion dagiti Saksi ni Jehova mainaig iti relihion ken iti panangtulongda iti sabsabali.

3. Umiso ken kanayon a ma-update dagiti personal nga impormasion. No maammuan ti organisasion nga adda kamali nga impormasion, dagus nga ilintegda dayta agingga a posible.

4. Maidulin laeng dagiti personal nga impormasion agingga a kasapulan tapno maibanag ti/dagiti panggep ti organisasion.

5. Mausig a naimbag dagiti bambanag tapno maprotektaran ti kalintegan dagiti makinkukua iti impormasion.

6. Adda dagiti maaramid nga addang tapno malapdan ti saan nga autorisado wenno saan a legal a pannakaipakaammo dagiti personal nga impormasion. Dagiti kompiuter a nakaikabilan dagiti personal nga impormasion ket adda password-na a dagiti laeng autorisado ti makaammo. Mai-lock dagiti opisina kalpasan ti trabaho ket dagiti laeng autorisado nga empleado ti makastrek kadagita.

7. Mayakar laeng dagiti personal nga impormasion kadagiti sangay no kasapulan iti pannakaibanag dagiti aktibidad ti organisasion dagiti Saksi ni Jehova mainaig iti relihion ken iti panangtulongda iti sabsabali. No inkeddengen ti maysa ti agbalin ken maam-ammo kas maysa a Saksi ni Jehova, immanamongen iti dayta.

Dagitoy a prinsipio iti pannakaprotektar dagiti personal nga impormasion sakupenna ti panagusar kadagiti personal nga impormasion a mabasa iti libro nga Organisado a Mangaramid iti Pagayatan ni Jehova a maited iti amin a Saksi ni Jehova apaman nga agbalindan nga agibumbunannag. Para iti ad-adu pay nga impormasion, kitaem ti Organisado a Mangaramid iti Pagayatan ni Jehova.

Ti kalintegan ti tunggal indibidual iti pannakaprotektar dagiti personal nga impormasion ken dagiti sensitibo a personal nga impormasion ken pannakailinteg wenno pannakai-delete dagiti personal nga impormasion ken dagiti sensitibo a personal nga impormasion ket maited maitunos iti ar-aramiden dagiti Saksi ni Jehova a naikabil iti Sangalubongan a Pagannurotan iti Panagusar Kadagiti Personal nga Impormasion, iti baba ti subtitulo a Dagiti Kalintegam.

Daytoy a Sangalubongan a Pagannurotan Dagiti Saksi ni Jehova iti Pannakaprotektar Dagiti Impormasion ipakitana ti pagibasaran no kasano nga usaren ken iproseso dagiti Saksi ni Jehova dagiti personal nga impormasion.