“Umdasen kenka ti nagpaiduma a kinaimbagko, ta naan-anay ti pannakabalinko kenka no nakapuyka.”—2 Corinto 12:9, Baro a Lubong a Patarus.

 “Umanayen kenka ti paraburko; ta napigpigsa ti pannakabalinko no nakapsutka.”—2 Corinto 12:9, Ti Baro a Naimbag a Damag Biblia.

 Ikarkari ti Dios nga ikkanna ni apostol Pablo iti bileg a kasapulanna tapno mapagballigianna dagiti pakasuotan ken pagkapuyanna.

 “Umdasen kenka ti nagpaiduma a kinaimbagko.” Ti sungbat ti Dios iti maulit-ulit a kararag ni Pablo ket mabalin met a maipatarus kas “ti kinaimbagko laeng ti kasapulam.” Kayatna a sawen, umdasen ti nagpaiduma a kinaimbag ti Dios tapno maibturan ni Pablo dagiti pakasuotanna. Kasano? Ti sao a naipatarus kas “nagpaiduma a kinaimbag,” wenno “parabur,” tukoyenna ti awan bayadna ken di kaikarian a sagut a sipaparabur nga inted ti Dios. Ipakita dagiti surat ni Pablo a dakkel ti naitulong kenkuana ti nagpaiduma a kinaimbag ti Dios. Uray no dati nga idaddadanes ni Pablo dagiti Kristiano, pinabileg ti Dios tapno mabalbaliwanna ti kababalinna ken matulonganna ti dadduma nga agbalin a Kristiano. (1 Corinto 15:9, 10; 1 Timoteo 1:12-14) Sigurado ni Pablo a tulongan ti Dios tapno mapagballigianna ti aniaman a problema wenno karit a pakaipasanguanna.

 “Ta naan-anay ti pannakabalinko kenka no nakapuyka.” Impalagip ni Apo Jehova a ken Pablo nga ad-adda a makita ti pannakabalinna no usarenna dayta a tumulong kadagiti nakapuy ken imperpekto a tattao. (2 Corinto 4:7; 12:8) No bigbigen dagiti Kristiano ti limitasionda ken agpatulongda ken Jehova, ipalpalubosda a naan-anay nga agtignay kadakuada ti pannakabalin ti Dios. (Efeso 3:16; Filipos 4:13) Kas resultana, makita ti pannakabalin ti Dios no nakapuy ti tao.

 Adda impaisurat ti Dios ken Pablo para kadagiti Kristiano idiay Corinto idi agarup 55 C.E. Iti maudi a paset dayta a surat, indepensana ti autoridadna kas apostol. Nariknana a masapul nga aramidenna dayta ta adda dagiti agkunkuna a mannursuro a nangkritikar kenkuana, a nalabit uy-uyawenda gapu iti langana wenno iti panagsaona.—2 Corinto 10:7-10; 11:5, 6, 13; 12:11.

 Iti panagdepensana, inlawlawag ni Pablo a saanna a maitungpal ti ministeriona ken maibturan ti nagadu a pakasuotan iti laeng bukodna a pigsa. (2 Corinto 6:4; 11:23-27; 12:12) Iti kapitulo 12, tinukoyna ti maysa a kasla “siit ti lasag.” Agparang a dayta ket agtultuloy a problema a mangparparigat kenkuana iti pisikal wenno emosional. (2 Corinto 12:7) Uray no saan a dineskribir ni Pablo ti problemana, determinado a mangibtur iti dayta iti tulong ti Dios.

 Mabalin a maipasango met ita dagiti Kristiano kadagiti pakarigatan ken pannakaidadanes. Maliwliwada ta ammoda nga ikkan ida ti Dios iti bileg nga eksakto a kasapulanda tapno maibturanda ti aniaman a problema a pakaipasanguanda. Kas ken Pablo, sikokompiansa a maibagada: “Nabilegak no nakapuyak.”—2 Corinto 12:10.

 Buyaem ti ababa a video tapno maammuam no ania ti pakabuklan ti libro a 2 Corinto.