“Iti daydiay makabael a mangaramid iti ad-adu pay ngem iti aglaplapusanan unay, nga agsobsobra pay iti amin a banag a kiddawen wenno mapanunottayo, maitunos iti pannakabalinna nga agtigtignay kadatayo, maikari kenkuana ti dayag.”—Efeso 3:20, 21, Baro a Lubong a Patarus.

 “Madaydayaw koma ti Dios a makaaramid iti nasursurok ken aglablabes pay ngem ti dawaten wenno panunotentayo babaen ti pannakabalin nga agtartrabaho kadatayo. Maipaay koma kenkuana ti dayaw.”—Efeso 3:20, 21, Naimbag a Damag Biblia.

 Inyebkas ni apostol Pablo ti panagtalekna a kaya ti Dios a sungbatan dagiti kararag ken aramiden ti namnamaen dagiti agdaydayaw kenkuana kadagiti pamay-an a kasla imposible kadakuada. Dagiti sungbatna ket mabalin a nalablabes pay ngem iti ekspektaren wenno namnamaenda.

 “Iti daydiay makabael, . . . maitunos iti pannakabalinna nga agtigtignay kadatayo.” Ipakita ti bersikulo 21 a ni Jehova a Dios a ti natukoy a “daydiay.” Iti dayta a bersikulo, insurat ni Pablo: “Maikari kenkuana ti dayag babaen ti kongregasion ken babaen ken Kristo Jesus.” (Juan 20:31) Kanayonanna, kayanatayo nga ikkan ti Dios iti bileg, wenno pigsa, a kasapulantayo tapno maaramidtayo ti pagayatanna.—Filipos 4:13.

 Iti bersikulo 20, adda intampok ni apostol Pablo nga espesial a banag maipapan iti abilidad ni Jehova a tumulong kadagiti agdaydayaw Kenkuana. Maipapan iti sasao nga “iti daydiay makabael,” kastoy ti ibaga ti maysa a reperensia: “Ti abilidad a nadakamat ditoy ket saan la a basta potensial, wenno posibilidad no di ket pannakabalin a mangaramid iti maysa a banag.” Saan a kas iti maysa a gayyem a tao, kanayon a kabaelan ni Jehova nga aramiden ti aniaman a kasapulan tapno maaywananna dagiti agdaydayaw kenkuana ken masungbatanna dagiti kararagda. Isuna laeng ti kakaisuna nga awan limitasion ti pannakabalin ken autoridadna.—Isaias 40:26.

 ‘Kabaelan ti Dios nga aramiden ti ad-adu pay ngem iti aglaplapusanan unay, nga agsobsobra pay iti amin a banag a kiddawen wenno mapanunottayo.’ Kabaelan ni Jehova nga ipaay ti aglaplapusanan unay, wenno uray “agsobsobra pay” para kadagiti agdaydayaw kenkuana. Matulonganna ida kadagiti pamay-an a nalablabes pay ngem iti mabalin a mapanunotda nga aglaplapusanan, wenno nakaparparabur.

 Adda pay sabali nga isuro kadatayo ti sasao nga “agsobsobra pay iti amin a banag a kiddawen wenno mapanunottayo.” Idi imbaga ni apostol Pablo dayta, kayatna a maawatan dagiti amin a Kristiano a kabaelan ti Dios a tulongan ida iti pamay-an a nalablabes pay ngem iti ekspektarenda. Kastoy ti panangipatarus Ti Biblia iti umuna a paset ti bersikulo 20: “Iti daydiay mannacabalin nga agaramid iti di matucod nga ad-adu ngem iti dagup ti isu-amin a mabalintayo a dawaten, wenno panunuten.” No dadduma, mabalin a marikna dagiti Kristiano a nakadakdakkel wenno nakakomkomplikado dagiti problemada. Baka dida pay ketdi ammo no ania ti ikararagda. Ngem awan ti limitasion ti pannakaawat wenno abilidad ni Jehova a tumulong. Iti umiso a tiempo, kabaelanna a solbaren ti aniaman a problema—ken aramiden dayta iti pamay-an a mabalin a saanda a mapanunot wenno kasla imposible kadakuada. (Job 42:2; Jeremias 32:17) Kabayatanna, ikkanna ida iti bileg tapno makapagibturda a siraragsak!—Santiago 1:2, 3.

 Ti libro nga Efeso ket surat ni apostol Pablo kadagiti Kristiano nga agnanaed iti siudad ti Efeso iti Asia Menor, a paset itan ti Turkey. Insurat ditoy ni Pablo ti dadduma kadagiti kararagna para kadakuada. (Efeso 3:14-21) Inkararagna a dagita a Kristiano—ken uray iti amin a Kristiano ita—ket masapul nga ad-adda pay a maawatanda ti ayat ti Kristo babaen ti panangtuladda iti naayat a panagpampanunot ken panagtigtignay ni Jesus. Iti maudi a paset ti kararag ni Pablo, indaydayawna ti Dios ken imbagana dagiti sasao a mabasa iti Efeso 3:20, 21.

 Buyaem daytoy ababa a video tapno makitam ti pakabuklan ti libro nga Efeso.