“Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman; ket ti talna ti Dios a mangartap iti amin a pannakaawat salaknibannanto ti puso ken isipyo babaen ken Kristo Jesus.”—Filipos 4:6, 7, Baro a Lubong a Patarus.

 “Awan koma ti pakadanaganyo, ngem tunggal agkararagkayo iti Dios ket agdawatkayo, diyo liplipatan ti agyaman kenkuana. Aywanannakayto ti talna ti Dios a di matukod a panunoten ti tao tapno natalged dagiti puso ken panunotyo iti pannakikaysayo ken ni Cristo Jesus.”—Filipos 4:6, 7, Ti Baro a Naimbag a Damag Biblia.

 No madandanagan unay dagiti agdaydayaw iti Dios, magin-awaanda no agkararagda kenkuana. Ikarkarina nga ikkanna ida iti talna. Dayta ti mangtulong kadakuada a mangsango kadagiti pakadanaganda ken mangprotektar iti panunot ken emosionda. Ibaga ti bersikulo 6 dagiti klase ti kararag a makatulong kadakuada tapno maaddaanda iti talna.

 Ti panagpakaasi ket kasta unay a panangikararag iti tulong ti Dios. Kas iti inaramid ni Jesus, mabalin nga agpakaasi ti maysa iti Dios no mais-stress wenno maipaspasango iti delikado a situasion. (Hebreo 5:7) Baka kasapulan a mamin-adu nga ikararag dayta.

 Ti panagkiddaw ket panangikararag kadagiti espesipiko a dawat iti Dios. Mabalin a kiddawen dagiti agdaydayaw kenkuana ti “amin” a banag. Ngem masapul a maitunos dagita a kararag iti pagayatan ti Dios a mabasa iti Biblia.—1 Juan 5:14.

 Ti panagyaman ket panangikararag iti Dios iti apresasion kadagiti inaramidna ken aramidennanto pay para kadatayo. No ipamaysatayo a panunoten dagiti rason nga agyamantayo iti Dios, makatulong dayta tapno agtultuloytayo a naragsak.—1 Tesalonica 5:16-18.

 Kas sungbat ti Dios kadagita a kararag, ikkanna dagiti agdaydayaw kenkuana iti talna. “Ti talna ti Dios” ket ti kinakalmado a marikna ti maysa gapu ta nadekket ti relasionna iti Dios. (Roma 15:13; Filipos 4:9) Daytoy a talna ti “mangartap iti amin a pannakaawat” gapu ta naggapu dayta iti Dios ken matulongannatayo iti pamay-an a sobra pay ngem iti ekspektarentayo.

 Ibaga daytoy a bersikulo ti Biblia a ti talna ti Dios salaknibanna ti pusotayo. Ti Griego a sao a naipatarus a ‘salakniban’ ket konektado iti maysa a sao a maus-usar iti militar. Iladawanna ti ar-aramiden idi dagiti soldado a mangguardia iti maysa a napaderan a siudad. Kasta met laeng ti maaramidan ti talna ti Dios. Protektaranna ti panunot ken emosion ti maysa a tao. Makatulong dayta kenkuana tapno saan a madanagan ken maburiboran kadagiti makapa-stress a problema.

 Maprotektarannatayo ti talna nga ited ti Dios “babaen ken Kristo Jesus,” gapu ta babaen ken Jesus, maaddaantayo iti relasion iti Dios. Inted ni Jesus ti biagna tapno masubbot dagiti basoltayo. No adda pammatitayo kenkuana, maawattayo dagiti bendision ti Dios. (Hebreo 11:6) Ni Jesus met ti dalan tapno makaasidegtayo iti Dios. Imbaga ni Jesus: “Awan ti makapan iti Ama no saan a magna kaniak.”—Juan 14:6; 16:23.

 Ti libro ti Biblia a Filipos ket insurat ni apostol Pablo kadagiti Kristiano nga adda iti siudad ti Filipos. a Iti kapitulo 4 ti libro, imparegta ni Pablo iti kongregasion nga agragsakda, ken nagyaman iti kinaparaburda, a nangparagsak kenkuana. (Filipos 4:4, 10, 18) Impakitana no kasano a mangyeg iti talna ti Dios ti panagkararag. Imbagana met no ania dagiti masapul a panunoten ken aramidentayo tapno tulongannatayo “ti Dios ti talna.”—Filipos 4:8, 9.