“Siak ni Jehova. Dayta ti naganko; diak ited ti dayagko iti asinoman, wenno ti dayawko kadagiti kinitikitan nga imahen.”—Isaias 42:8, Baro a Lubong a Patarus.

 “Siak laeng ti APO a Diosmo. Awan ti didiosen a mairaman iti dayagko; diak ipalubos dagiti kinitikitan a ladawan a mairaman iti pannakaidaydayawko.”—Isaias 42:8, Naimbag a Damag Biblia.

 Imbaga kadatayo ti Dios ti personal a naganna ken saanna nga ipalubos nga agdayawtayo kenkuana babaen kadagiti idolo wenno imahen.

 Pinanaganan ti Dios ti bagina iti nagan a maipatpatarus kas “Jehova” iti lengguahe nga Iloko. a (Exodo 3:14, 15) Uray no nausar ti nagan ti Dios iti dandani 7,000 a daras iti Daan a Tulag (Hebreo-Aramaiko a Kasuratan), iti adu a patarus, nasukatan dayta iti “APO” (dadakkel a letra). Kas pagarigan, iti padto iti Salmo 110:1, a tumukoy ken Jehova ken ni Jesus, kastoy ti patarus ti Naimbag a Damag Biblia: “Kinuna ti APO [ni Jehova] iti apok [ni Jesus].” (Aramid 2:34-36) Tapno saan a makatikaw ti dua nga “Apo,” inkabil ti Baro a Lubong a Patarus ti nagan ti Dios iti umiso a pakaikabilanna. Kastoy ti mabasa: “Imbaga ni Jehova iti Apok: ‘Agtugawka iti makannawanko agingga nga ikabilko dagiti kabusormo a pagbatayan dagiti sakam.’”

 Mamati ti adu nga eskolar ti Biblia a ti kaipapanan ti nagan ti Dios ket “Pagbalinenna.” Ti laeng pudno a Dios ti makatungpal iti kaipapanan dayta a nagan ta isuna laeng ti makapagbalin iti bagina wenno dagiti parsuana iti kasapulan a pagbalinanda tapno matungpal ti panggepna.

 Kas Namarsua kadatayo ken isuna laeng ti pudno a Dios, ni laeng Jehova ti maikari a pagdayawantayo. Awanen ti sabali, persona man dayta wenno banag, a maikari a pagdayawantayo, uray dagiti idolo ken imahen.—Exodo 20:2-6; 34:14; 1 Juan 5:21.

 Kadagiti umuna a bersikulo ti Isaias kapitulo 42, impakpakauna ni Jehova ti aramidento ti ‘pinilina.’ Imbaga ti Dios a daytoy a napili nga adipen “iyegnanto ti hustisia kadagiti nasion.” (Isaias 42:1) Maipapan iti dayta a kari, kinuna ti Dios: “Ipakaammok itan ti baro a bambanag. Ibagak ti maipapan kadagita sakbay a tumaudda.” (Isaias 42:9) Kalpasan ti ginasut a tawen, ti padto maipapan iti ‘napili’ ket timmaud wenno pimmudno, idi dimteng ti Mesias, wenno Kristo, tapno aramidenna ti ministeriona ditoy daga.—Mateo 3:16, 17; 12:15-21.

 “Siac ni Jehova, dayta ti naganco; ket ti dayagco diacto ited iti sabali; ket diac met ited ti dayawko cadagiti kinitikitan a ladladawan.”—Ti Biblia, Philippine Bible Society.

 “Siak ni Yahweh, dayta ti naganko. Awan ti didiosen a mairanud iti dayagko; diak ipalubos dagiti imahen a mairaman iti pannakaidaydayawko.”—Ti Baro a Naimbag a Damag Biblia.