Dagiti Judio idi panawen ni propeta Jeremias ti tuktukoyen ti Dios iti daytoy a bersikulo. Gapu ta saanda nga inkankano dagiti linteg ken naayat a panangdisiplina ni Jehova a babaen kadagiti propetana, saanna ida a prinotektaran kadagiti didigra a resulta dagiti dakes nga aramidda.—Proverbio 1:24-32.

 “Gapuna, imbaga ni Jehova.” Ti sao a “gapuna” ikonektarna daytoy a bersikulo kadagiti immun-una a bersikulo. Iti Jeremias 11:1-10, imbaga ni Jehova iti ilina a saanda a tinungpal ti pannakitulag dagiti ammada kenkuana. (Exodo 24:7) Imbes nga agdaydayaw dagiti Judio iti Namarsua kadakuada, nagdaydayawda ketdi kadagiti idolo. Nagresulta dayta nga apostasia iti adu a kinadakes, a pakairamanan ti panangidatonda kadagiti annakda.—Jeremias 7:31.

 “Mangyegak iti didigra.” No ibaga ti Biblia nga aramiden ti Dios ti maysa a banag, kaaduanna a kaipapananna nga ipalubosna laeng a mapasamak dayta. Kasano nga agpayso dayta iti daytoy a situasion? Gapu ta nagdaydayaw ti ili ni Jehova kadagiti ulbod a didiosen ken saanda a tinungpal dagiti lintegna a pagsayaatanda koma, napasaranda ti adu a rigat. Kasta met, saan idan a prinotektaran ti Dios. Kas resultana, sinakup ti nabileg a kabusor—ti ari ti Babilonia—ti Jerusalem ken pinagbalinna nga adipen dagiti umili. Saan ida a naisalakan dagiti ulbod a didiosen a nagtalkanda.—Jeremias 11:12; 25:8, 9.

 Uray no impalubos ti Dios a mapasaran ti ilina dagita a trahedia, dina kayat a sawen a dakes wenno saan a patas isuna. Kuna ti Santiago 1:13: “Saan a mabalin a masubok ti Dios iti dakes a bambanag, ken saanna met a suboken ti asinoman.” Agpayso a mabasa iti patarus a Ti Biblia nga ‘iyegto ti Dios ti dakes’ kadagiti Judio. Ngem ti orihinal a sao b a naipatarus kas “dakes” iti Jeremias 11:11 ket mabalin met a maipatarus kas “kalamidad” wenno “didigra”—sasao nga eksakto a mangiladawan kadagiti rigat a napasaran dagiti Judio.

 “Inton agpakaasida kaniak iti tulong, saankonto ida a denggen.” Saan a denggen ni Jehova dagiti kararag dagidiay ‘napno ti imada iti dara’ wenno dagidiay agtaltalek kadagiti ulbod a didiosen. (Isaias 1:15; 42:17) Ngem denggenna dagidiay naimpusuan nga agbabbabawi kadagiti dakes nga aramidda ken dagidiay sipapakumbaba nga agsubli kenkuana.—Isaias 1:16-19; 55:6, 7.

 Idi tawen 647 B.C.E., inapointaran ni Jehova ni Jeremias nga agbalin a propetana. Uppat a pulo a tawen a pinakpakdaaran ni Jeremias dagiti umili ti Juda maipapan iti panangukom ti Dios, ngem saanda dimngeg. Dayta ti tiempo nga insurat ti propeta dagiti sasao iti Jeremias 11:11. Ket idi 607 B.C.E., natungpal met laengen dagiti padto nga impakdaarna idi dinadael dagiti taga-Babilonia ti Jerusalem.—Jeremias 6:6-8; 39:1, 2, 8, 9.

 Naglaon met ti libro a Jeremias iti mensahe a mangted iti namnama. Imbaga ni Jehova: “Inton natungpalen ti 70 a tawen a kaaddayo idiay Babilonia, . . . tungpalekto ti inkarik ket isublikayo iti daytoy a lugar [ti nakayanakan dagiti Judio].” (Jeremias 29:10) ‘Tinungpal’ ni Jehova dayta a kari idi 537 B.C.E., idi sinakupen dagiti Medo ken Persiano ti Babilonia. Dagiti Judio a naiwarawara iti dati nga imperio ti Babilonia ket pinagsubli ni Jehova iti daga a nakayanakanda tapno isublida manen ti pudno a panagdaydayaw.—2 Cronicas 36:22, 23; Jeremias 29:14.

 Buyaem ti ababa a video tapno maammuam no ania ti pakabuklan ti libro a Jeremias.