“Ta awan ti deklarasion nga imposible iti Dios.”—Lucas 1:37, Baro a Lubong a Patarus.

 “Ta awan ti saan a kabaelan ti Dios nga aramiden.”—Lucas 1:37, Ti Baro a Naimbag a Damag Biblia.

 Maaramid ti Mannakabalin-amin a Dios dagiti bambanag nga imposible iti panangmatmat ti tao. Awan ti makalapped kenkuana a mangtungpal kadagiti ibaga wenno ikarina.

 Ti orihinal a lengguahe a nausar para iti termino a “deklarasion” iti daytoy a teksto ket mabalin a tumukoy iti “sao” wenno “pagsasao” ti Dios. Mabalin met a resulta dayta ti imbaga ni Jehova a a Dios. Gapu ta kanayon a pumudno ti sao ti Dios, mabalin met a maipatarus ti Lucas 1:37 kas: “Ta dagiti kari ti Dios ket saan a pulos mapaay” wenno “Ta iti Dios, awan ti imposible.” Amin dagitoy a pannakaipatarus ti orihinal a Griego a teksto ket maymaysa ti ipaawatda a kinapudno: Awan ti deklarasion wenno kari ti Dios a saan a matungpal, ta awan ti imposible kenkuana.—Isaias 55:10, 11.

 No maipapan kadagiti kari ti Dios, adda dagiti umasping a sasao a mabasa iti nadumaduma a paset ti Biblia. Kas pagarigan, inusar ni Jehova ti anghelna a mangipakpakauna ken Abraham nga agsikogto ti awan anakna nga asawana a ni Sara uray baketen. Innayon ti Dios: “Adda kadi imposible ken Jehova?” (Genesis 18:13, 14) Kalpasan a pinampanunot ti patriarka a ni Job dagiti parsua ti Dios, naibagana: “Iti amin a pampanunotem nga aramiden, awan ti imposible kenka.” (Job 42:2) Ken idi inyebkas dagiti pasurot ni Jesus ti pakadanaganda no kabaelanda met la a ragpaten ti estandarte ti Dios para kadagiti isalakanna, impalagip ni Jesus kadakuada nga “awan ti imposible iti Dios.”—Mateo 19:25, 26. b

 Ti sasao iti Lucas 1:37 ket imbaga ti maysa nga anghel nga agnagan Gabriel. Kasarsaritana ti Judio a birhen nga agnagan Maria. Kaibagbaga la ni Gabriel nga iyanakto ni Maria ti “Anak ti Kangatuan” ken ‘panaganannanto iti Jesus.’ Isunto ti agbalin nga Ari iti Pagarian ti Dios, ket agnanayonto ti panagturayna.—Lucas 1:26-33; Apocalipsis 11:15.

 Dinamag ni Maria no kasano a mapasamak dayta idinto ta awan asawana ken ‘saan a makidendenna iti lalaki.’ (Lucas 1:34, 35) Insungbat ni Gabriel nga usaren ti Dios ti nasantuan nga espirituna, wenno aktibo a puersana. Iti dayta a tiempo, ni Jesus ket espiritu nga anak ti Dios idiay langit. Isu nga inusar ni Jehova ti nasantuan nga espirituna tapno ti biag ti anakna ket mayakar iti aanakan ni Maria. (Juan 1:14; Filipos 2:5-7) Simimilagro ngarud a nagsikog ni Maria. Tapno mapabileg ti pammati ni Maria iti pannakabalin ti Dios, imbaga ti anghel kenkuana a ti kabagianna a ni Elisabet ket nabiit pay a nagsikog uray “baketen.” Lupes ni Elisabet isu nga awan ti anakda ken ni lakayna a Zacarias. (Lucas 1:36) Ni Juan a Mammautisar ti nagbalin nga anakda, ket impakpakauna met laeng ni Jehova ti ministeriona.—Lucas 1:10-16; 3:1-6.

 Nalabit pampanunoten ni anghel Gabriel da Maria ken Elisabet idi imbagana dagiti sasao iti Lucas 1:37. Dagita met laeng a sasao ti mangipasigurado kadagiti agdaydayaw ken Jehova ita nga agtultuloy a tungpalen ti Dios dagiti karina. Karaman iti dayta ti karina a suktanna dagiti gobierno ti tao iti nalinteg a panagturay ti Anakna a ni Jesu-Kristo, ti Ari iti Nailangitan a Pagarian ti Dios.—Daniel 2:44; 7:13, 14.

 Buyaem daytoy ababa a video tapno makitam ti pakabuklan ti libro a Lucas.