“Madaydayaw koma ti Dios idiay langit, ket ditoy daga, maadda koma ti talna kadagiti tattao a parparaburanna.”—Lucas 2:14, Baro a Lubong a Patarus.

 “Gloria iti Dios iti kangatoan a langit! Ket ditoy daga, kappia ken talna kadagiti tattao a pakaragsakanna!”—Lucas 2:14, Ti Baro a Naimbag a Damag Biblia.

 Dagitoy a sasao ti pammadayaw nga imbaga dagiti anghel idi nayanak ni Jesus, ipakitana a dagidiay mamati ken Jesus ket maaddaan iti pabor ti Dios ken makarikna iti talna.

 “Madaydayaw koma ti Dios idiay langit.” Ipakita dagitoy nga imbaga dagiti anghel a maikari ti Dios nga umawat iti amin a dayaw. Ipakita pay dagitoy a sasao a ti pannakayanak ken ti ministerio ni Jesus ditoy daga ket mangipaay iti dayaw ken Jehova a a Dios. Kas pagarigan, no mangisursuro ni Jesus, kanayon nga iturongna ti dayaw iti Dios, kas idi imbagana: “Ti isursurok ket saan a naggapu kaniak, no di ket naggapu iti daydiay nangibaon kaniak.” (Juan 7:16-18) No agaramid idi ni Jesus kadagiti milagro, masansan nga idaydayaw dagiti makakitkita kadagita ti Dios. (Lucas 5:18, 24-26; Juan 5:19) Uray ti ipapatay ni Jesus ket nangyeg iti dayaw iti Dios. Pinagbalinna a posible ti pannakatungpal ti panggep ti Dios a mapno ti daga kadagiti nalinteg ken managayat iti talna a tattao.—Genesis 1:28.

 “Ditoy daga, . . . talna.” Daytoy a talna ket saan la a basta kinaawan ti gubat. Ramanenna daytoy ti kinakalmado a posible laeng no adda ti pabor ni Jehova iti maysa a tao. Gapu ken Jesus, posible a maaddaan dagiti tattao iti natalna a relasion iti Dios. (Santiago 4:8) Ken kas Ari ti Pagarian ti Dios, ipaayto ni Jesus ti naan-anay ken manayon a talna iti intero a daga.—Salmo 37:11; Lucas 1:32, 33.

 “Tattao a parparaburanna.” Tuktukoyen dagitoy a sasao dagiti tattao a parparaburan ti Dios, wenno pabpaboranna, gapu iti pudno a pammatida kenkuana ken iti daydiay imbaonna, ni Jesus. Ngem dina kayat a sawen dayta a pabpaboran ti Dios ti amin a tattao, aniaman ti kababalin wenno ar-aramidenda. Saan met a tumukoy dagitoy iti kinaimbag a mabalin nga ipakita dagiti tattao. Naipatarus dagitoy a sasao kas “naimbag a nakem kadagiti tattao” iti dadduma a patarus, kas iti Ti Biblia. Ngem suportaran dagiti mas nadadaan ken mapagtalkan a Griego a manuskrito ti panangipatarus ti Baro a Lubong a Patarus ken ti adu a dadduma pay a moderno a patarus ti panangyallatiwda iti ideya nga adda talna kadagiti tattao a pabpaboran ti Dios.—Kitaen “ Ti Lucas 2:14 iti Dadduma Pay a Patarus.”

 Deskribiren ti Lucas kapitulo 2 ti umuna a tawtawen ti panagbiag ni Jesus kas tao. Kalpasan unay ti pannakayanakna, nagparang ti maysa nga anghel kadagiti pastor nga “um-umyan iti away nga agbambantay kadagiti karneroda iti rabii.” b (Lucas 2:4-8) Impakaammo ti anghel ti “naimbag a damag a pakaragsakan unay ti amin a tattao,” imbagana kadagiti pastor: “Ita, nayanak kadakayo iti siudad ni David ti maysa a mangisalakan, ti Kristo nga Apo.” (Lucas 2:9-11) Naibaga kadagiti pastor no pakasarakanda iti kayyanak nga ubing, idi kuan, nakitada ti nakaad-adu nga anghel a mangidaydayaw iti Dios. Idi nakadanon dagiti pastor iti Betlehem, nakitada ni Maria ken ni Jose ken ti kayyanak nga ubing a ni Jesus. (Lucas 2:12-16) Kalpasan nga inyestoria dagiti pastor ti nakaskasdaaw a kapadasanda, nagsublida kadagiti arbanda ket ‘intantan-ok ken indaydayawda ti Dios gapu iti amin a nangngeg ken nakitada.’—Lucas 2:17-20.

 “Dayaw iti Dios idiay cangatoan, ken talna iti rabaw ti daga, naimbag a nakem cadagiti tattao.”—Lucas 2:14, Ti Biblia.

 “Gloria iti Dios iti kangatoan a langit! Ket ditoy daga, kappia kadagiti tattao a pakaay-ayoanna!”—Lucas 2:14, Naimbag a Damag Biblia.

 Buyaem daytoy ababa a video tapno makitam ti pakabuklan ti libro a Lucas.