“Italekmo ken Jehova ti aniaman nga aramidem, ket agballiginto dagiti planom.”—Proverbio 16:3, Baro a Lubong a Patarus.

 “Dawatem ti APO a bendisionanna dagiti kayatmo nga aramiden, ket agballigika iti panangibanagmo kadagiti panggepmo.”—Proverbio 16:3, Ti Baro a Naimbag a Damag Biblia.

 Ipasigurado daytoy a proverbio kadagiti agdaydayaw iti pudno a Dios nga agballigi dagiti planoda no agtalekda kenkuana babaen ti panangammo ken panangsurotda iti panangidalanna.

 “Italekmo ken Jehova ti aniaman nga aramidem.” Sakbay a mangaramid iti desision dagiti agdaydayaw ken Jehova, a sipapakumbaba nga agpaiwanwanda kenkuana. (Santiago 1:5) Apay? Gapu ta masansan a bassit ti maaramidan wenno saan a kontrolado dagiti tattao dagiti pasamak a mangapektar iti biagda. (Eclesiastes 9:11; Santiago 4:13-15) Kasta met, mabalin nga agkasapulanda iti sirib tapno maaramidda dagiti planoda. Gapu kadagita a rason, adu ti agpannuray wenno mangitalek kadagiti planoda iti Dios. Ikararagda ti panangiwanwanna ken agtignayda maitunos iti pagayatanna kas mabasa iti Saona, ti Biblia.—Proverbio 3:5, 6; 2 Timoteo 3:16, 17.

 Ti sasao a “dawatem ti APO b a bendisionanna dagiti kayatmo nga aramiden” literal a kaipapananna nga “itulidmo dagiti aramidem iti APO.” Sigun iti maysa a reperensia, iladawan dagita a sasao “ti maysa a tao a mangiyak-akar iti nadagsen nga awitna iti maysa a napigpigsa a mangawit iti dayta.” Masigurado dagidiay sipapakumbaba nga agpannuray iti Dios a tulongan ken suportaranna ida.—Salmo 37:5; 55:22.

 Ti sasao nga “aniaman nga aramidem” dina kayat a sawen nga aprobaran ti Dios wenno bendisionanna ti amin a plano dagiti tattao. Tapno bendisionan ida ni Jehova, dagiti planoda ket masapul a maitunos kadagiti estandarte ken pagayatanna. (Salmo 127:1; 1 Juan 5:14) Saan a bendisionan ti Dios ti panagsukir. Kinapudnona, “laplapdanna ti plano dagiti managdakdakes.” (Salmo 146:9) Ngem suportaranna dagidiay agpaspasakup kenkuana ta sursurotenda dagiti estandartena a masarakan iti Biblia.—Salmo 37:23.

 “Ket agballiginto dagiti planom.” Dadduma ti nangipatarus kadagita a sasao kas “maipasdekto dagiti planom.” Iti Hebreo a Kasuratan, wenno iti gagangay a maaw-awagan iti Daan a Tulag, ti sao a naipatarus kas “maipasdekto,” ipaawatna ti ideya a mangipatakder iti pundasion, ken masansan a tumukoy dayta iti kinatibker dagiti parsua ti Dios. (Proverbio 3:19; Jeremias 10:12) Kasta met, ipasdekto a sititibker ti Dios dagiti plano dagidiay mangar-aramid iti umiso, ken tulonganna ida a maaddaan iti nataltalged ken naragragsak a biag.—Salmo 20:4; Proverbio 12:3.

 Daytoy a proverbio ket insurat ni Ari Solomon, a nangputar iti kaaduan a paset ti libro a Proverbio. Nakapagsao iti rinibu a proverbio gapu ta inikkan ti Dios iti sirib.—1 Ar-ari 4:29, 32; 10:23, 24.

 Iti kapitulo 16, indaydayaw ni Solomon ti sirib ti Dios ken impakitana a kagura ti Dios dagiti natangsit. (Proverbio 16:1-5) Ti kapitulo tulonganna dagiti agbasbasa a mangtarus iti kinapudno a maulit-ulit a masarakan iti libro a Proverbio: Agbalin laeng a pudpudno a masirib ken naballigi ti maysa a tao no napakumbaba, ken ipalubosna a ti Dios ti mangiturong iti addangna. (Proverbio 16:3, 6-8, 18-23) Masansan a maulit-ulit iti Biblia daytoy a nagpateg a kinapudno.—Salmo 1:1-3; Isaias 26:3; Jeremias 17:7, 8; 1 Juan 3:22.

 Buyaem daytoy ababa a video tapno makitam ti pakabuklan ti libro a Proverbio.