Adu a nagannak ti mangpampanunot kadagiti pagdaksan ti panagusar iti social media, isu a saanda a palubosan dagiti annakda nga agusar iti dayta. Ngem no ipalubosmo nga agusar ti tin-edyermo iti social media, kasano a matulongam tapno maliklikanna dagiti negatibo nga epekto dayta ken masursurona ti umiso a panagusar iti Internet?

Iti daytoy nga artikulo

•  Dagiti prioridad ti tin-edyermo

•  Ti emosional a salun-at ti tin-edyermo

•  Ti ugali ti tin-edyermo online

•  Dagiti makatulong iti pannakisaritam

 Ti masapul a maammuam: Gapu ta makaadikto ti social media, mabalin a kasapulan ti tin-edyermo ti tulongmo tapno makontrolna ti kaadu ti oras nga us-usarenna iti dayta.

 Prinsipio ti Biblia: ‘Siguraduenyo ti napatpateg a bambanag.’—Filipos 1:10.

 Panunotem: Ag-agawen kadi ti social media ti oras ti anakmo para iti pannaturog, panageskuela, wenno para iti pamilia? Kuna dagiti researcher a kasapulan dagiti tin-edyer ti agarup 9 nga oras a pannaturog kada rabii, ngem dagidiay agus-usar iti social media iti adu nga oras kada aldaw ket mabalin a kurang a 7 nga oras ti turogda.

 Ti mabalinmo nga aramiden: Pagsaritaanyo iti tin-edyermo dagiti masapul a mayun-una, ken no apay a nasayaat a limitaranna ti oras nga us-usarenna iti social media. Mangtedka kadagiti rasonable a kondision, kas iti saan a maipalubos ti gadyet iti uneg ti kuarto no rabii. Ti panggepmo ket tapno matulongam ti tin-edyermo a makasursuro nga agteppel—kualidad a makatulong kenkuana inton agbalin nga adulto.—1 Corinto 9:25.

 Ti masapul a maammuam: No makita ti maysa nga agtutubo dagiti na-edit a selfie ken puro nararagsak a piktiur dagiti gagayyemna, mabalin a malidayan, madepres, ken mariknana nga agmaymaysa.

 Prinsipio ti Biblia: “Ikkatenyo iti bagiyo ti . . . apal.”—1 Pedro 2:1.

 Panunotem: Masuron kadi ti tin-edyermo iti itsurana gapu ta ikomkomparana ti bagina kadagiti makitkitana iti social media? Para iti anakmo, nakaek-eksayting kadi ti biag ti dadduma ngem boring ti biagna?

 Ti mabalinmo nga aramiden: Pagsaritaanyo iti tin-edyermo no apay a delikado ti panangikompara. Laglagipem a mabalin a mas apektado dagiti babbai ngem kadagiti lallaki, ta mas maseknan dagiti babbai iti relasionda iti dadduma ken iti itsura ti bagida. Mabalinmo pay ketdi nga isingasing iti tin-edyermo a sagpaminsan laeng nga agusar iti social media. Imbaga ti maysa nga agtutubo nga agnagan Jacob: “Adda tiempo nga in-delete-ko pay laeng ti social-media app-ko. Nakatulong dayta tapno mai-adjust-ko dagiti prioridadko ken ti panangkitak iti bagik ken iti dadduma.”

 Ti masapul a maammuam: No agus-usarka iti social media kaslaka adda iti sango ti adu a tattao. Normal laeng nga adda tumaud a di pagkikinnaawatan ken riri.

 Prinsipio ti Biblia: “Ikkatenyo kadakayo ti amin a kita ti sakit ti nakem, panagunget, panagpungtot, panagbugkaw, nasakit a panagsasao . . . Agbalinkayo a naimbag iti tunggal maysa.”—Efeso 4:31, 32.

 Panunotem: Nakasursuro kadi ti tin-edyermo nga agtsismis, makiapa, wenno agsao iti dakes gapu iti social media?

 Ti mabalinmo nga aramiden: Tulongam ti anakmo a mangipakita iti nasayaat nga ugali online. Kuna ti libro a Digital Kids: “Paset ti responsabilidadtayo kas nagannak a silalawag nga isuro kadagiti annaktayo a saan a maakseptar ti kinaulpit, iti man personal wenno online.”

 Laglagipem a ti social media ket saan a kasapulan ken saan nga amin a nagannak palpalubosanda dagiti tin-edyerda nga agusar iti dayta. Ngem no ipalubosmo nga agusar ti tin-edyermo iti social media, siguraduem nga ammonan a kontrolen ti oras nga us-usarenna, no siasino dagiti nasayaat a pakigayyemanna, ken kayanan a liklikan dagiti saan a nasayaat a linaon dayta.