Imbaga kenka ti anakmo a mabul-bully idiay eskuelaan. Ania ti mabalinmo nga aramiden? Ibagam iti eskuelaan a dusaenda ti bully? Suruam ti anakmo no kasano a bumales? Sakbay nga agdesisionka, usigem ti sumagmamano nga impormasion maipapan iti panang-bully.

•  Ania ti masapul a maammuak maipapan iti panang-bully?

•  Kasano a makatulongak?

 Ania ti panang-bully? Ti panang-bully ket ti agtultuloy ken inggagara a panangpasakit iti pisikal wenno emosional a pamay-an. No kasta, saan a tunggal pananginsulto wenno makapasuron nga aramid ket panang-bully.

 No apay a napateg: Usaren ti dadduma a tattao ti sao a “panang-bully” iti aniaman a makapasuron nga aramid, uray bassit laeng dayta. Ngem no pagbalinem nga isyu ti babassit laeng a pasamak, dimo mapupuotan a laplapdam ti anakmo a makasursuro no kasano a solbaren dagiti problema​—abilidad a masapulna ita ken inton adulton.

 Prinsipio ti Biblia: “Saanka nga alisto nga agpungtot.”—Eclesiastes 7:9.

 Laglagipem: Adda dagiti situasion a mabalin a makibiangka, ngem adda met dagiti situasion a mangted iti gundaway iti anakmo tapno makasursuro a makibagay iti tattao ken saan nga agbalin a naarsagid.—Colosas 3:13.

 Ngem kasanon no ibaga ti anakmo a mapaspasaranna ti agtultuloy ken inggagara a pananginsulto wenno panangpasakit?

•   Siaanus a dumngegka iti anakmo. Padasem nga ammuen (1) no ania ti mapaspasamak ken (2) no apay a mabul-bully. Dika agkonklusion no saanmo nga ammo ti amin a detalye. Isaludsodmo iti bagim, ‘Adda kadi sabali pay a rason?’ Tapno maammuam ti amin a detalye, baka masapul a kasaritam ti titser ti anakmo wenno dagiti nagannak ti estudiante a mangbul-bully.

   Prinsipio ti Biblia: “Ti sumungbat a dagus a di pay dimngeg ket maag ken maibabain.”—Proverbio 18:13.

•   No talaga a mabul-bully ti anakmo, tulongam tapno maawatanna a ti reaksionna ket posible a mangpasayaat wenno mangpakaro iti situasion. Kas pagarigan, ibaga ti Biblia: “Ti naalumamay a sungbat pabaawenna ti pungtot, ngem ti nagubsang a sao rubrobanna ti unget.” (Proverbio 15:1) Wen, masansan a dakes ti resulta ti panagibales. Imbes a sumardeng ti panang-bully, kumarkaronto pay ketdi dayta.

   Prinsipio ti Biblia: “Diyo subadan ti panangdangran iti panangdangran.”​—1 Pedro 3:9.

•   Ilawlawagmo iti anakmo a no saan nga agibalbales, saanna a kayat a sawen nga isu ket takrot. Ipakpakitana ketdi a natured ta dina ipalubos nga adda sabali a mangkontrol kenkuana. No ar-arigen, maabakna ti bully uray saan nga agbalin a bully.

   Nagpateg daytoy a laglagipen ti anakmo lalo no mabul-bully iti internet. No makiapa babaen ti social media​—palpalubosanna ketdi nga agtultuloy ti bully, ken mabalin a mapaneknekan a maysa met a bully ti anakmo a kas iti ibagbaga ti bully maipapan kenkuana! Isu a no dadduma, ti kasayaatan nga aramiden ket baybay-an lattan​—maysa a taktika a mabalin a mangpasardeng iti bully iti dakes nga ar-aramidenna ken mangpakalma iti anakmo.

   Prinsipio ti Biblia: “Maiddep ti apuy no awan ti sungrod.”​—Proverbio 26:20.

•   No dadduma, mabalin a liklikan ti anakmo dagiti tattao ken lugar a pakapasamakan ti panang-bully. Kas pagarigan, no ammona ti masansan nga ayan ti maysa a tao wenno grupo, maliklikanna ti ma-bully no sabali ti pagnaanna.

   Prinsipio ti Biblia: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”​—Proverbio 22:3.

 PADASEM DAYTOY: Tulongam ti anakmo a mangpanunot kadagiti mabalin a nasayaat wenno di nasayaat a resulta dagiti aramidenna. Kas pagarigan:

•  Ania ti mabalin a mapasamak no dina lattan pampansinen ti bully?

•  Kasano no sipaprangka nga ibagana iti bully a sumardeng iti panang-bully-na?

•  Kasano no ipulongna ti bully iti eskuelaan?

•  Mapasardengna kadi ti bully babaen ti panagbalinna a mannakigayyem wenno managpakatawa?

 Iti man online wenno sangonsango, agduduma ti tunggal situasion a pakapasamakan ti panang-bully. Isu a tulongam ti anakmo a mangbirok iti praktikal a solusion. Ipasiguradom nga isu ket suportaram iti daytoy a problema.

 Prinsipio ti Biblia: “Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.