Iti maysa a surbey, 97 a porsiento kadagiti tin-edyer ti nangibaga nga agus-usarda iti social media. Kayat kadi ti anakmo ti agusar iti social media? No wen, adda dagiti masapul nga ikabilangam.

Iti daytoy nga artikulo

•  Ti pangus-usaran ti anakmo iti orasna

•  Ti kapanunotan ti anakmo iti pannakigayyem

•  Ti emosional a salun-at ti anakmo

•  Ti kababalin ti anakmo online

•  Kasapulan kadi ti social media?

•  Ti kuna dagiti nagannak

 “Nadisenio dagiti social media platform a mangagaw iti atensionmo, kanayonka a naka-online, ken sangkakitam ti gadyetmo no adda update,” kuna ti website a HelpGuide.

 “Kunak no apagbiitak lang nga ag-scroll ngem diak napuotan nga adun nga orasak nga agkitkita ti post iti social media. Saanko a maibba-ibbatan ti selponko, isu a diak maaramiden dagiti napatpateg a banag.”—Lynne, 20.

 Isaludsodmo iti bagim: Makapagteppelto kadi ti anakko tapno masurotna dagiti limitasion nga inaramidko iti panagusarna iti social media? Kabaelan kadin ti anakko ti mangi-set kadagiti limitasionna ken surotenna dagita?

 Prinsipio ti Biblia: “Itultuloyyo ti agannad a naimbag a ti pannagnayo ket . . . kas kadagiti masirib, nga usarenyo ti tiempoyo iti kasayaatan a pamay-an.”—Efeso 5:15, 16.

 Ipakita ti termino a “social media” nga adda gagayyem dagiti agus-usar iti dayta wenno konektadoda kadagiti tattao nga am-ammoda. Ngem masansan a pammarang laeng dayta a panaggayyem.

 “Nadlawko nga adu nga agtutubo ti mangipapan a no ad-adu ti like wenno followers-da, mas ipatpateg idan ti dadduma, uray dida met talaga am-ammo ida.”—Patricia, 17.

 Isaludsodmo iti bagim: Ammo kadi ti anakko a saan nga importante ti panagbalin a popular online? Ammona kadi ti personal a makigayyem kadagiti tattao?

 Prinsipio ti Biblia: “Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

 Imbaga dagiti researcher a ti nalabes a panangusar iti social media ket konektado iti kinaliday, panagdanag, ken uray pannakadepres.

 “Nagmadi iti rikna a makita ti piktiur dagiti gagayyemmo, a kaduada ti dadduma a gagayyemmo, nga awanka.”—Serena, 19.

 Isaludsodmo iti bagim: Kabaelan kadi ti anakko ti saan nga agpokus iti bagina, saan a makikompetensia, wenno di agpaapektar iti makitkitana nga ar-aramiden ti dadduma iti social media?

 Prinsipio ti Biblia: “Ditay koma agbalin a napangas, ditay irugrugi ti panagkokompetensia, ken ditay agiinnapal.”—Galacia 5:26.

 Mabalin a maengganio ti anakmo a makiraman iti cyberbullying, sexting, wenno agbuya iti pornograpia no agus-usar iti social media. Uray no saan nga aramiden ti anakmo dagita, mabalin a maipasango kadagita.

 “Nadlawko a naglaka nga agbalin a dakes dagiti post iti social media. Nakaad-adu ti naalas a panagsasao ken musika.”—Linda, 23.

 Isaludsodmo iti bagim: Ammo kadin ti anakko nga usaren a naimbag ti internet? Kaya kadin ti anakko a liklikan dagiti di umiso a material?

 Prinsipio ti Biblia: “Saan man la koma a madakamat iti tengngayo ti seksual nga immoralidad ken ti tunggal kita ti kinarugit wenno kinaagum, . . . uray ti nakababain nga aramid wenno minamaag a panagsasao wenno naalas a panagang-angaw.”—Efeso 5:3, 4.

 Saan a kasapulan ti tao ti social media tapno agbiag wenno agbalin a naragsak. Kaya ti adu nga agtutubo ti agbiag uray awan ti social media, agraman dagiti dati nga agus-usar iti dayta.

 “Idi nakitak ti dakes nga epekto ti social media ken manangko, nagdesisionak a saanen a mangusar iti dayta. Manipud idin, naragragsakakon ken ad-adun ti maar-aramidko.”—Nathan, 17.

 Laglagipem: Sakbay nga ipalubosmo nga agusar ti anakmo iti social media, siguraduem nga ammonan a suroten dagiti limitasion ti panangusarna, liklikan dagiti di nasayaat a post, ken no kasano a maaddaan iti nasayaat a gagayyem.

 Prinsipio ti Biblia: “Panunoten ti masirib ti tunggal addangna.”—Proverbio 14:15.