Naibaga kadin ti asawam a madandanagan iti panaginummo iti arak? No wen, adda dagiti masapul nga ikabilangam.

Iti daytoy nga artikulo

•  Dakes nga epekto ti sobra a panaginum iti relasionyo nga agassawa

•  Sobra kadi ti panaginummo iti arak?

•  Dimo kayat nga aminen nga adda problemam

•  Ti mabalinmo nga aramiden

 Ti sobra a panaginum ket mabalin nga agresulta iti sakit, kas iti liver cirrhosis, sakit ti puso, ken kanser. Ngem saan la a ti salun-atmo ti apektaranna. Apektaranna met ti relasionyo nga agassawa gapu ta mabalin a dayta ti pakaigapuan iti kinaranggas iti pamilia, problema iti kuarta, panangtraidor iti asawa, ken diborsio.

 Ibaga ti Biblia a no adu nga arak ti mainummo, ‘kumagat dayta a kas iti uleg ken mangiruar iti gita a kas iti karasaen.’ (Proverbio 23:32) Kasanom a maammuan no sobra ti panaginummo iti arak?

 Makatulong dagitoy a saludsod tapno maammuam ti sungbat:

•   Saanmo kadi a mateppelan ti uminum?

•   Sangkapanunotmo kadi no kaanoka manen nga uminum?

•   Uminumka kadi latta uray no dayta ti rason dagiti problemam ken ti problemayo nga agassawa?

•   Adda kadi dagiti saan a nasayaat a marikriknam no padasem nga isardeng ti aginum?

•   Ti kadi panaginummo ti maysa a rason nga agapakayo nga agassawa?

•   Napigpigsaka kadi itan nga uminum?

•   Iliblibasmo kadi ti aginum wenno adda ilemlemmengmo nga arak iti balayyo wenno iti pagtrabahuam?

 No wen ti sungbatmo iti maysa wenno iti ad-adu pay kadagita a saludsod, mabalin a sobran ti panaginummo iti arak wenno mabalin a maysakan nga alkoholiko.

 Naibaga kadin ti asawam a madandanagan gapu iti panaginummo iti arak? No wen, mabalin a naibagam a saan a problema dayta, wenno inkalintegam pay ketdi. Baka pinabasol mo pay ti dadduma, agraman ti asawam. Baka imbagam:

•   “No nasayaat koma ti panangtratom kaniak, saanak nga aginum.”

•   “No ammom la koma ti stress ken bannogko iti trabaho, sigurado a, nga uminumka met.”

•   “Ad-adu pay a, ti am-ammok a nalalaing nga uminum ngem siak.”

 No kasta ti naibagam, saan ngata a napatpategen kenka ti panaginummo ngem iti naragsak a relasionyo nga agassawa? Ania koma ti masapul a napatpateg?

 Prinsipio ti Biblia: “Ti naasawaan a lalaki maringgoran . . . no kasano a maparagsakna ti asawana.”—1 Corinto 7:33.

•   Denggem ti ibagbaga ti asawam. Uray no kasla sobra ti panagdanag ti asawam iti panaginummo, baka kasapulan latta nga adda aramidem a panagbalbaliw. Ngamin, no itultuloymo ti aginum uray madandanagan ti asawam, mabalin a seniales daytan nga adda problemamon iti panaginum iti arak.

   Prinsipio ti Biblia: “Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.”—1 Corinto 10:24.

•   Ammuem ti agpaypayso nga impormasion. Tapno mangabak ti maysa a soldado, masapul nga ammona no kasano ti pamay-an ti kalabanna nga umatake. Kasta met laeng ti sobra a panaginum iti arak. Tapno malabanam dayta, masapul nga ammuem dagiti epektona ken no apay nga adu ti maal-allukoy nga uminum. Masapul met nga ammuem dagiti epektibo a pamay-an tapno maisardengmo ti sobra a panaginum iti arak ken maliklikam ti uminumto manen.

   Prinsipio ti Biblia: “Itultuloyyo a liklikan dagiti tarigagay ti lasag a bumusbusor kadakayo.”—1 Pedro 2:11.

•   Agpatulongka. Adu dagiti medikal a programa a nairanta a tumulong kadagiti alkoholiko. Karaman ditoy dagiti programa tapno makarekober ti maysa, kasta met dagiti medikal nga institusion ken ospital. Mabalinmo met a kasarita ti maysa a manakem a gayyemmo a makatulong kenka a mangkita iti dadduma a rason no apay a saanmo a makontrol ti panaginummo. Ket no mariknam a kayatmo manen ti uminum, tawagam dayta a gayyemmo.

   Prinsipio ti Biblia: “Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

 Ti sobra a panaginum ket saan a simple a problema. Saan nga automatiko a masolbar dayta iti basta panangbasam iti ababa nga artikulo wenno iti basta panangibagam, “Wen, kissayakon ti inumek.” Ngem laglagipem koma nga aniaman ti aramidem a mangsolbar iti dayta, apektaranna saan la a ti salun-atmo no di ket lallalo pay ti relasionyo nga agassawa.

 Para iti ad-adu pay nga impormasion: Basaem dagitoy nga artikulo tapno maammuam no kasano a naisardeng ti dadduma ti sobra a panaginumda iti arak.

 “Saanakon a Naranggas”

 “Saanko Itan nga Ibain ti Bagik”

 “Kalsada ti Naggigianak”

 Buyaem met ti video a ‘Naumaakon iti Panagbiagko’