Isursuro Kadi ti Biblia ti Reinkarnasion?

I-PLAY

Sungbat ti Biblia

Saan, saanna nga isursuro. Awan iti Biblia ti sao a “reinkarnasion” wenno ti ideya maipapan iti dayta. Naibasar ti kapanunotan maipapan iti reinkarnasion iti pannursuro a ti kararua ket immortal wenno saan a matay. a Ngem isursuro ti Biblia a ti kararua ket isu ti sibubukel a tao. Ngarud, mortal wenno matay ti kararua. (Genesis 2:7; Ezequiel 18:4) No matay ti maysa a tao, awan isunan.—Genesis 3:19; Eclesiastes 9:5, 6.

Ania ti nagdumaan ti reinkarnasion ken panagungar?

Ti pannursuro ti Biblia maipapan iti panagungar dagiti natay ket saan a naibasar iti pannursuro nga immortal ti kararua. Inton panagungar, dagiti tattao a natay ket agbiag manen babaen iti pannakabalin ti Dios. (Mateo 22:23, 29; Aramid 24:15) Mangted ti panagungar iti pudno a namnama nga agbiagto manen dagiti natay iti baro a daga nga addaan iti gundaway a din pulos matay.—2 Pedro 3:13; Apocalipsis 21:3, 4.

Di umiso a kapanunotan maipapan iti reinkarnasion ken iti Biblia

Di umiso: Ibagbaga ti Biblia a ni propeta Elias ket nagbiag manen kas ni Juan Bautista babaen ti reinkarnasion.

Umiso: Impakpakauna ti Dios: “Ibaonko kadakayo ni Elias a mammadto,” ket impakita ni Jesus a tinungpal ni Juan Bautista daytoy a padto. (Malakias 4:5, 6; Mateo 11:13, 14) Ngem saan a kayat a sawen daytoy a ni Elias ket nagbiag manen kas ni Juan Bautista babaen ti reinkarnasion. Imbaga a mismo ni Juan a saan nga isuna ni Elias. (Juan 1:21) Imbes ketdi, kas iti inaramid idi ni Elias, impakaammo ni Juan ti mensahe ti Dios nga agbabawi koma dagiti tattao. (1 Ar-ari 18:36, 37; Mateo 3:1) Pinaneknekan met ni Juan nga isu ket ‘nabileg ken mannakabalin a kas ken ni propeta Elias.’—Lucas 1:13-17, Ti Baro a Naimbag a Damag Biblia.

Di umiso: Ti reinkarnasion ti tuktukoyen ti Biblia a “pannakayanak manen” wenno born again.

Umiso: Ti pannakayanak manen a tuktukoyen ti Biblia ket iti naespirituan a pamay-an a mapasamak bayat a sibibiag pay ti maysa a tao. (Juan 1:12, 13) Daytoy a pannakayanak manen ket saan a di maliklikan a resulta dagiti naaramidan ti maysa. Imbes ketdi, maysa dayta a bendision manipud iti Dios a mangyeg iti nagpaiduma a namnama iti masanguanan para kadagiti umawat iti dayta.—Juan 3:3; 1 Pedro 1:3, 4.

a Naggapu iti nagkauna a Babilonia ti panamati iti immortal a kararua ken iti reinkarnasion. Idi agangay, binukel dagiti Indian a pilosopo ti doktrina a Karma. Sigun iti Britannica Encyclopedia of World Religions, ti Karma ket “isu ti linteg maipapan iti makagapu ken epekto, a mangibagbaga nga aniaman ti ar-aramiden ti maysa iti agdama, adda epektona iti sumaruno a biagna.”—Panid 913.