Wen. Imbaga ni Jesus a mabalin nga agpaagas dagiti pasurotna idi kinunana a “dagiti tattao a nasalun-at saanda a kasapulan ti mangngagas, no di ket dagiti masaksakit.” (Mateo 9:12) Nupay ti Biblia ket saan a libro ti medisina, naglaon daytoy kadagiti prinsipio a mangiwanwan kadagidiay mayat a mangay-ayo iti Dios.

Isaludsodmo iti bagim

 1. Nalawag kadi kaniak ti naisingasing a panangagas? Kuna ti Biblia nga agsukimattayo kadagiti mapagtalkan nga impormasion imbes a ‘patientayo ti tunggal sao.’—Proverbio 14:15.

 2. Rumbeng kadi nga agpakonsultaak iti dua wenno tallo a doktor? Ti “kinaadu dagiti manangbalakad” ket dakkel ti maitulongna, nangruna no nakaro ti sakitmo.—Proverbio 15:22.

 3. Ti kadi pamay-an ti panangagas salungasingenna ti bilin ti Biblia nga ‘umadayo iti dara’?—Aramid 15:20.

 4. Ti kadi pamay-an ti panangdayagnos wenno panangagas ket adda karamanna nga espiritismo? Kondenaren ti Biblia ti “panangannurot iti espiritismo.” (Galacia 5:19-21) Tapno maammuam no adda pakainaiganna iti espiritismo, usigem dagitoy a saludsod:

•   Ti kadi doktor ket agus-usar iti espiritismo?

•   Ti kadi pamay-an ti panangagas ket naibatay iti pammati a nagsakitka gapu ta adda napaguram nga espiritu wenno adda nanggamud kenka?

•   Kasapulan kadi dagiti atang, orasion, wenno dadduma pay nga espiritistiko a ritual wenno banag iti panangisagana wenno panangusar iti agas?

 5. Sobra kadi ti pannakaseknak iti salun-atko? Kuna ti Biblia: “Ti kinanainkalinteganyo maammuan koma dagiti amin a tattao.” (Filipos 4:5) Makatulong ti panagbalin a nainkalintegan tapno maipamaysam “ti napatpateg a bambanag,” kas iti naespirituan a bambanag.—Filipos 1:10; Mateo 5:3.