Iti Biblia, ti termino nga espiritualidad ket nauneg a tarigagay a mangparagsak iti Dios ken mangtulad iti panagpampanunotna. Ti naespirituan a tao ikagumaanna a suroten dagiti paglintegan ti Dios ken agpaiwanwan iti nasantuan nga espirituna. a—Roma 8:5; Efeso 5:1.

 No ilawlawag ti Biblia ti espiritualidad, kaaduanna nga ikomparana ti ar-aramiden ti saan a naespirituan a tao iti naespirituan a tao. Kas pagarigan, “saan nga akseptaren ti pisikal a tao ti bambanag maipapan iti espiritu ti Dios,” wenno pannursuro ti Dios, ngem saan a kasta ti naespirituan a tao. (1 Corinto 2:14-16) Ti nainlasagan a tao ket nalaka nga ‘agimon ken makiriri’ ngem manangted ken mannakikappia ti naespirituan a tao. (1 Corinto 3:1-3) Ken dagidiay manangpadpadakes ken mamagsisina kadagiti nadekket nga aggagayyem “agtigtignayda a kasla animal, saanda nga agpapaiwanwan iti Dios,” wenno saanda a naespirituan a tao.—Judas 19; Proverbio 16:28. b

Iti daytoy nga artikulo

•  Apay a posible a maaddaantayo iti espiritualidad?

•  Apay nga importante ti espiritualidad?

•  Kasanoak nga agbalin a naespirituan a tao?

•  Masapul kadi nga adda relihionko tapno agbalinak a naespirituan a tao?

•  Di umiso a kapanunotan maipapan iti espiritualidad

•  Bersikulo iti Biblia maipapan iti espiritualidad

 Posible a maaddaantayo iti espiritualidad gapu ta naaramidtayo a kaladladawan ti Dios. (Genesis 1:27) Isu a saantayo a masdaaw nga apresiaren ken kayat ti kaaduan a tattao ti agsursuro maipapan kadagiti banag a saan a makita wenno saan a maiggaman.

 Nayanaktayo a kayatayo nga ipakita dagiti kualidad ni Jehova c a Dios, kas iti asi, awan pabpaboranna, ken mannakikappia. (Santiago 3:17) Kasta met, ited ti Dios ti nasantuan nga espirituna kadagidiay mangikagkagumaan a mangsurot kadagiti bilinna.—Aramid 5:32.

 No naespirituan ti maysa, mabalin a maaddaan iti “biag ken talna.” (Roma 8:6) Nakapatpateg dagita a regalo ti Dios.

•   Biag: Ikarkari ti Dios nga agbiag nga agnanayon dagiti naespirituan a tattao.—Juan 17:3; Galacia 6:8.

•   Talna: Daytoy ket natalna a relasion iti Dios. Ngem ibilang ti Dios a kabusor dagidiay nakapokus laeng kadagiti pisikal a kasapulanda. (Roma 8:7) Kanayonanna, ikkan ti Dios dagidiay agporporsegi nga agbalin a naespirituan a tao iti “talna ti Dios a mangartap iti amin a pannakaawat.” (Filipos 4:6, 7) Makatulong dayta tapno agbalinda a naragragsak.—Mateo 5:3.

•   Ammuem ken tungpalem dagiti bilin ti Dios. Maaramidmo dayta no basaem ti Biblia, a naglaon kadagiti kapanunotan ti Dios nga insurat dagiti lallaki a ‘tinignay ti nasantuan nga espiritu.’ (2 Pedro 1:21) Dagiti masursurom ket makatulong tapno makapagdaydayawka iti Dios “maitunos iti espiritu ken kinapudno,” nga idaldalan ti nasantuan nga espiritu ken maitunos iti pagayatan ti Dios.—Juan 4:24.

•   Ikararagmo ti tulong ti Dios. (Lucas 11:13) Tulongannaka ti Dios a maaddaan kadagiti kababalin a mangipakita a naespirituanka a tao. (Galacia 5:22, 23) Maaddaanka met iti sirib tapno kayam a sanguen dagiti problema iti biag.—Santiago 1:5.

•   Makikaduaka kadagiti naespirituan a tao. Tulongandaka a mangpatibker iti espiritualidadmo. (Roma 1:11, 12) Ngem no makikaduaka kadagiti tattao a saan a kas iti Dios ti panagpampanunotna, kumapuy ti espiritualidadmo.—Santiago 4:4.

 Saan a gapu ta adda relihionmo, automatiko metten a naespirituanka a tao. Ibaga ti Biblia: “No ipagarup ti asinoman nga isu ket relihioso ngem saanna a medmedan ti dilana, al-allilawenna ti pusona, ket awan serserbi ti panagdaydayawna.”—Santiago 1:26, footnote.

 Ngem ipakita ti Biblia a dagiti naespirituan a tao ket agdaydayaw iti Dios iti pamay-an a kayatna. Patienda nga adda laeng “maysa nga espiritu”—ti nasantuan nga espiritu ti Dios. Dayta nga espiritu ti mangtignay kadakuada nga agdaydayaw iti Dios kas “maysa a bagi,” maysa nga organisado a grupo a mangar-aramid iti amin tapno agtultuloy ti ‘panagkaykaysa a nagun-odanda babaen ti nasantuan nga espiritu.’—Efeso 4:1-4.

 Di umiso: Amin a parsua ket addaan iti espiritualidad.

 Umiso: Amin a pinarsua ti Dios ket makaited iti dayaw kenkuana. (Salmo 145:10; Roma 1:20) Ngem dagiti laeng intelehente a parsua ti mabalin a maaddaan iti espiritualidad. Naiduma dagiti animal ta nainkasigudan a sirib laeng ti us-usarenda ken saanda a mabalin ti makigayyem iti Dios. Dagiti ar-aramidenda ket para laeng kadagiti pisikal a kasapulanda. (2 Pedro 2:12) Isu a pinagduma ti Biblia ti espiritualidad iti inaanimal a panagpampanunot ken kababalin.—Santiago 3:15; Judas 19.