Agpayso a napasamak ti Layus. Inyeg dayta ti Dios tapno madadael dagiti dakes a tattao, ngem binilinna ni Noe nga agaramid iti daong tapno maispal dagiti naimbag a tattao ken animal. (Genesis 6:11-20) Mamatitayo a talaga a napasamak ti Layus ta naisurat dayta iti Kasuratan, nga “inwanwan ti Dios ti pannakaisurat[na].”​—2 Timoteo 3:16.

•  Pudno wenno sarsarita?

•  Apay a napasamak ti Layus?

•  Ammo kadi dagiti tattao a mapasamak ti Layus?

•  Ania ti itsura ti daong ni Noe?

•  Kasano kapaut nga inaramid ni Noe ti daong?

•  Dagiti sarsarita maipapan iti dakkel a layus

 Ibaga ti Biblia a ni Noe ket pudpudno a nagbiag ken ti Layus ket pudpudno a pasamak, saan a sarsarita laeng.

•   Patien dagiti mannurat iti Biblia a pudpudno a nagbiag ni Noe. Kas pagarigan, nalaing iti historia ti mannurat iti Biblia a da Esdras ken Lucas ket inramanda ni Noe iti listaan ti kapuonan ti nasion ti Israel. (1 Cronicas 1:4; Lucas 3:36) Dagiti mannurat iti Ebanghelio a da Mateo ken Lucas insuratda dagiti imbaga ni Jesus maipapan ken Noe ken iti Layus.​—Mateo 24:37-39; Lucas 17:26, 27.

   Dinakamat met da propeta Ezekiel ken apostol Pablo ni Noe kas pagtuladan iti pammati ken kinalinteg. (Ezekiel 14:14, 20; Hebreo 11:7) Rasonable kadi nga ibaga dagitoy a mannurat a tuladentayo ti maysa a tao no estoria laeng ti maipapan kenkuana? Nalawag a ni Noe ken ti dadduma pay a lallaki ken babbai ket ulidan iti pammati gapu ta pudpudno a nagbiagda.​—Hebreo 12:1; Santiago 5:17.

•   Mangted ti Biblia kadagiti espesipiko a detalye maipapan iti Layus. Ti salaysay ti Biblia maipapan iti Layus ket saan a mangrugi iti “Idi un-unana a panawen,” a kasla es-estoria laeng. Ibaga ketdi ti Biblia ti tawen, bulan, ken aldaw a pannakapasamak dagiti banag a konektado iti Layus. (Genesis 7:11; 8:4, 13, 14) Dakamatenna pay dagiti rukod ti daong nga inaramid ni Noe. (Genesis 6:15) Ipakita dagitoy a detalye iti Biblia nga agpaypayso ti Layus, saan nga estoria laeng.

 Kuna ti Biblia a sakbay ti Layus, “nakaro ti kinadakes ti tao.” (Genesis 6:5) Ibagana pay a “nadadael ti daga iti imatang ti pudno a Dios” gapu ta napno iti kinaranggas ken seksual nga immoralidad.​—Genesis 6:11; Judas 6, 7.

 Dakamaten ti Biblia nga adu kadagitoy a problema ket gapuanan dagiti dakes nga anghel a bimmaba ditoy daga tapno makidenna kadagiti babbai. Naaddaan iti annak dagitoy nga anghel a naawagan iti Nefilim, ket nangyegda iti rigat kadagiti tattao. (Genesis 6:1, 2, 4) Inkeddeng ti Dios a dalusan ti daga iti kinadakes ken inikkanna iti gundaway dagiti naimbag a tattao a mangabaruanan.​—Genesis 6:6, 7, 17.

 Wen. Imbaga ti Dios ken ni Noe ti mapasamak ken binilinna nga agaramid iti daong tapno maispal ti pamiliana ken dagiti animal. (Genesis 6:13, 14; 7:1-4) Pinakdaaran ni Noe dagiti tattao maipapan iti mapasamak a Layus, ngem saanda nga inkaskaso. (2 Pedro 2:5) Ibaga ti Biblia: “Saanda a nangikankano agingga a dimteng ti Layus ket nayanudda amin.”​—Mateo 24:37-39.

 Ti daong ket kasla dakkel a rektanggulo a lakasa, wenno kahon, nga agarup 133 a metro (437 ft) ti kaatiddogna, 22 a metro (73 ft) ti kaakabana, ken 13 a metro (44 ft) ti kangatona. a Naaramid dayta iti natutot a kayo, ken nakalupkopan iti alkitran ti uneg ken ruarna. Addaan iti tallo a kadsaaran ken sumagmamano a dibision. Adda ruangan iti sikigan ti daong ken mabalin nga adda tawa iti asideg ti atepna. Posible a ti daong ket addaan iti atep a nangatngato bassit ti tengngana ngem iti sikiganna tapno agayus ti danum.—Genesis 6:14-16.

 Saan nga ibaga ti Biblia no kasano kapaut nga inaramid ni Noe ti daong, ngem nalabit sumagmamano a dekada nga inaramidna dayta. Nasurok a 500 ti tawen ni Noe idi nayanak ti inauna nga anakna, ken 600 ti tawenna idi napasamak ti Layus. b—Genesis 5:32; 7:6.

 Imbilin ti Dios ken ni Noe nga aramidenna ti daong inton dadakkel ken naasawaanen ti tallo nga annakna, a mabalin nga immabut iti agarup 50 wenno 60 a tawen. (Genesis 6:14, 18) No agpayso dayta, agparang a nainkalintegan a maibagatayo a nairingpas ti daong kalpasan ti 40 wenno 50 a tawen.