Da Adan ken Eva ti immuna a tao a nagbasol. Sinukirda ti Dios idi nanganda manipud iti “kayo a pakaammuan iti naimbag ken dakes.” Daytoy ti aw-awagan ti adu kas orihinal wenno sigud a basol. a (Genesis 2:16, 17; 3:6; Roma 5:19) Naiparit kada Adan ken Eva ti mangan manipud iti dayta a kayo gapu ta irepresentar dayta ti autoridad ti Dios, wenno ti kalinteganna a mangikeddeng iti umiso ken di umiso para iti tao. Idi nanganda manipud iti kayo, isudan ti nangikeddeng no ania ti umiso ken di umiso a saanda koma a rumbeng nga aramiden. Gapu iti dayta, linaksidda ti autoridad ti Dios.

•  Ania ti epekto ti “orihinal a basol” kada Adan ken Eva?

•  Ania ti epekto ti “orihinal a basol” kadatayo?

•  Posible kadi a mawayawayaantayo kadagiti resulta ti “orihinal a basol”?

•  Di umiso a kapanunotan maipapan iti “orihinal a basol”

 Gapu iti basol, limmakay ni Adan ken bimmaket ni Eva sa natayda idi agangay. Dinadaelda ti relasionda iti Dios ket napukawda ti namnamada nga agbiag nga agnanayon ken perpekto a salun-at.—Genesis 3:19.

 Naipatawid da Adan ken Eva ti kinaimperpekto kadatayo amin a kaputotanda, no kasano a matawid dagiti annak dagiti depekto ti nagannakda. (Roma 5:12) Isu nga amintayo ket nayanak nga “addaan iti basol,” b kayatna a sawen, nayanaktayo nga imperpekto ken nalaka kadatayo ti agbasol.—Salmo 51:5; Efeso 2:3.

 Gapu iti natawidtayo a basol, wenno kinaimperpekto, agsakit, lumakay, bumaket, ken mataytayo. (Roma 6:23) Apitentayo met dagiti dakes a resulta ti kamalitayo ken dagiti kamali ti dadduma.—Eclesiastes 8:9; Santiago 3:2.

 Wen. Kuna ti Biblia a natay ni Jesus “kas pangabbong a daton para kadagiti basoltayo.” (1 Juan 4:10, footnote) Gapu iti daton ni Jesus, posible a mawayawayaantayo kadagiti epekto ti natawidtayo a basol ken maadda kadatayo ti banag a napukaw da Adan ken Eva, ti namnama a biag nga agnanayon ken perpekto a salun-at.—Juan 3:16. c

 Di umiso: Gapu iti orihinal a basol, pulos a saantayon a maaddaan iti nasayaat a relasion iti Dios.

 Umiso: Saannatayo a pabasolen ti Dios gapu iti inaramid da Adan ken Eva. Maawatanna nga imperpektotayo ken saanna a namnamaen ti nalablabes ngem iti kabaelantayo. (Salmo 103:14) Nupay agsagsagabatayo gapu iti natawidtayo a basol, addaantayo iti oportunidad ken pribilehio nga agbalin a nadekket a gayyem ti Dios.—Proverbio 3:32.

 Di umiso: No mabautisaran ti maysa a tao, mawayawayaan manipud iti orihinal a basol isu a masapul a mabuniagan dagiti ubbing.

 Umiso: Agpayso a napateg ti bautismo tapno maisalakan ti maysa, ngem ti laeng panamati iti daton ni Jesus ti mangdalus kenkuana iti basol. (1 Pedro 3:21; 1 Juan 1:7) Gapu ta ti pudno a pammati ket naibatay iti pannakaammo, saan ngarud a posible a maaddaan iti pammati dagiti tagibi. Saan ngarud nga isursuro ti Biblia ti panangbuniag kadagiti tagibi. Nalawag nga ammo daytoy dagiti nagkauna a Kristiano. Saan a kas kadagiti tagibi, nabautisaranda kas “lallaki ken babbai” nga addaan iti pammati iti Sao ti Dios.—Aramid 2:41; 8:12.

 Di umiso: Inlunod ti Dios dagiti babbai gapu ta ni Eva ti immuna a nangan iti maiparit a bunga.

 Umiso: Saan a dagiti babbai ti inlunod ti Dios no di ket ti nagkauna nga uleg, “daydiay naawagan iti Diablo ken Satanas,” a nangsugsog ken ni Eva nga agbasol. (Apocalipsis 12:9; Genesis 3:14) Maysa pay, ti imbilang ti Dios a kangrunaan a manungsungbat iti orihinal a basol ket ni Adan, saan a ti asawana.—Roma 5:12.

 Apay nga imbaga ti Dios nga iturayan ni Adan ti asawana? (Genesis 3:16) Saanna a kayat a sawen dayta a konkonsintiren ti Dios ti kasta a panangdominar. Ibagbagana laeng ti dakes nga epekto ti basol iti relasion ti agassawa. Namnamaen ti Dios nga ayaten ken padayawan ti lalaki ti asawana ken ipakitana ti nauneg a respeto kadagiti babbai.—Efeso 5:25; 1 Pedro 3:7.

 Di umiso: Ti orihinal a basol ket seksual a panagdenna.

 Umiso: Ti orihinal a basol ket saan a seksual a panagdenna gapu kadagitoy a rason:

•   Imbilinen ti Dios ken ni Adan a saan a mangmangan manipud iti kayo a pakaammuan iti naimbag ken dakes idi awan pay ti asawana.—Genesis 2:17, 18.

•   Binilin ti Dios da Adan ken Eva nga “agpaaduda,” kayatna a sawen, maaddaanda iti annak. (Genesis 1:28) No dinusa ti Dios ti immuna nga agassawa gapu iti banag nga imbilinna kadakuada, saan ngata a kinaulpit dayta?

•   Saan a naggiddan a nagbasol da Adan ken Eva. Immuna ni Eva, sa kalpasanna ni lakayna.—Genesis 3:6.

•   Ipalubos ti Biblia ti seksual a panagdenna ti agassawa a lalaki ken babai.—Proverbio 5:18, 19; 1 Corinto 7:3.