Ipakita ti Biblia a ti Dios saanna a pinarsua ti Diablo. Imbes ketdi, pinarsuana ti maysa a persona a nagbalin a Diablo. Kastoy ti kuna ti Biblia maipapan iti Dios: “Naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; Isu nalinteg ken napalungdo.” (Deuteronomio 32:3-5) Kadagita a sasao, maikunatayo nga adda idi tiempo a perpekto ken nalinteg ni Satanas a Diablo, kinapudnona, maysa idi kadagiti anghel nga annak ti Dios.

 Iti Juan 8:44, kinuna ni Jesus a ti Diablo ket “saan a nagtakder a di maisin iti kinapudno,” a mangipakita a ni Satanas ket sigud a napudno ken awanan basol.

 Ngem kas kadagiti dadduma a parsua ni Jehova nga addaan iti pannakabael nga agpanunot, ti anghel a nagbalin a Satanas ket addaan iti wayawaya nga agpili iti naimbag wenno dakes. Gapu ta pinilina a busoren ti Dios ken sinugsoganna a kumanunong kenkuana ti umuna a pagassawaan, inaramidna ti bagina kas Satanas, a ti kayatna a sawen ket “Bumusbusor.”—Genesis 3:1-5; Apocalipsis 12:9.