Saan. Ipakita ti Biblia a ti Dios laeng ti pagkararagantayo babaen iti nagan ni Jesus. Kinuna ni Jesus kadagiti adalanna: “Kastoy ngarud ti panagkararagyo: Amami sadi langit: Madaydayaw koma ti nasantoan a naganmo.” (Mateo 6:9, Ti Baro a Naimbag a Damag Biblia) Pulos a saanna nga imbaga kadagiti adalanna nga agkararagda kadagiti santo, anghel, wenno iti siasinoman no di ket iti Dios laeng.

 Kinuna pay ni Jesus kadagiti pasurotna: “Siak ti dalan, ken ti pudno, ken ti biag; awan ti makapan iti Ama no di magna kaniak.” (Juan 14:6, Ti Baro a Naimbag a Damag Biblia) Ni Jesus laeng ti inautorisaran ti Dios a mangibabaet kadatayo.—Hebreo 7:25.

No ngay agkararagak iti Dios ken kadagiti santo?

 Iti maysa kadagiti Sangapulo a Bilin, kinuna ti Dios: “Siak, ti APO a Diosmo, managimonak a Dios.” (Exodo 20:5, New American Bible) Iti ania nga anag a ‘managimon’ ti Dios? Iti footnote ti New American Bible kunana nga isu ket “mangalkalikagum iti naipamaysa a debosion.” Kalikaguman ti Dios a maipaay laeng kenkuana dayta a debosion wenno panagdaydayaw—a pakairamanan ti kararag.—Isaias 48:11.

 Masaktantayo ti Dios no sabali ti pagkararagantayo, kadagiti man santo wenno nasantuan nga anghel. Idi nagruknoy ni Juan iti maysa nga anghel, isu ket inatipa ti anghel babaen ti panangibagana: “Dimo aramiden ti kasta! Adipenak met a kas kenka ken kas kadagiti kakabsatmo a nangpaneknek iti pudno maipapan ken ni Jesus. Ti Dios laeng ti pagdaydayawam!”—Apocalipsis 19:10, Ti Baro a Naimbag a Damag Biblia.