Adda kadi gayyem wenno kapamiliam a nabiit pay a natay? No wen, makatulong kenka daytoy nga artikulo tapno mailiwliwagmo ti ipapatayna.

Iti daytoy nga artikulo

•  Sobra kadi ti panagladingitko?

•  Ti aramidem bayat nga agladladingitka

•  Ti kuna dagiti padam nga agtutubo

 Adu a tattao ti grabe ken nabayag ti panagladingitda.

 “Inaldaw a malaglagipko ni lolo. Uray dua a tawenen a natay, agsangitak latta no malagipko isuna.”—Olivia.

 “Ni lola ti numero uno a mangsupsuporta kadagiti goal-ko, ngem awanen idi magaw-atko ti aniaman kadagita. Nalidayak kada magaw-atko ti maysa a kalat ta saannan a makita dayta.”—Alison.

 No agladladingitka, aglalaok ti mariknam. Kas pagarigan:

 “Idi natay ni angkelko, nakigtotak ken saanak a mamati, ken nabayag sakbay a naakseptarko dayta. Dayta ti damo nga adda natay nga asideg kaniak ket kaslaak la nadungpar iti tren.”—Nadine.

 “Kasuronko ni lolok idi natay, ta dina inan-annadan ti salun-atna, uray sangkaibagami dayta.”—Carlos.

 “Adda amin nga asideg a kabagianmi idi natay ni lolok, dakami laeng ken manang ti awan. Idi kuan, nakonsiensiaak ta diak man la nakapagpakada ken lolo.”—Adriana.

 “Natay iti aksidente iti lugan ti agassawa a nadekket iti pamiliami. Isu a kada adda pumanaw a kapamiliak iti balay, mabutengak ta pampanunotek a baka matay met.”—Jared.

 “Idi natay ni lolak tallo a tawenen ti napalabas, agbabbabawiak ta diak man la nakalkalangen unay idi sibibiag pay.”—Julianna.

 Gagangay a makigtot, masuron, makonsiensia, mabuteng, ken agbabawi ti maysa nga agladladingit. No marikriknam ti aniaman kadagita, laglagipem nga in-inutto met laeng a mailiwliwagmo dagita. Kabayatanna, kasanom a mailiwliwag ti ladingitmo?

 Makisaritaka iti maysa a gayyem. Kuna ti Biblia a ti pudno a gayyem ket “mapangnamnamaan no adda rigat.” (Proverbio 17:17) Makatulong no ibagam iti maysa a gayyem ti marikriknam.

 “Normal laeng ti agladingit. Nupay kayam no dadduma nga iliwliwag dayta nga agmaymaysa, baka ad-adda a kumaro ti ladingitmo. Isu a nasayaat nga ibagam ti riknam iti maysa a gayyem.”—Yvette.

 Laglagipem ti ay-ayatem. Kuna ti Biblia nga “iruar ti naimbag a tao ti naimbag nga adda iti pusona.” (Lucas 6:45) Mabalinmo nga isurat dagiti naragsak a panagkaduayo wenno mangaramidka iti scrapbook.

 “Insuratko ti amin a banag nga insuro kaniak ti gayyemko sakbay a natay, isu nga agtultuloy a mabembenepisiaranak iti ulidanna. Nakatulong kaniak ti panangisuratko iti riknak tapno mailiwliwagko ti ipapatayna.”—Jeffrey.

 Aywanam ti salun-atmo. Bigbigen ti Biblia ti pagsayaatan ti panagehersisio. (1 Timoteo 4:8) Siguraduem a nasustansia ti kankanem, agehersisioka, ken umdas ti panaginanam.

 “Mabalin a saan a husto ti panagpanunotmo no nalidayka, isu a siguraduem a nasalun-atka. Manganka ken maturogka a naimbag.”—Maria.

 Tulongam ti dadduma. Kuna ti Biblia: “Naragragsak ti mangted ngem ti umawat.”—Aramid 20:35.

 “Ikagumaam ti tumulong iti dadduma, lalo kadagidiay padam a natayan. Ipalagip daytoy nga agladladingitda met a kas kenka.”—Carlos.

 Ikararagmo ti marikriknam. Awagan ti Biblia ni Jehova a Dios a “Managdengngeg iti kararag.” (Salmo 65:2) Ibagana pay a ni Jehova “paimbagenna dagiti nasaktan ti pusoda; bedbedanna dagiti sugatda.”—Salmo 147:3.

 “Kiddawem ken Jehova ti suporta ken pammaregta a kasapulam. Mabalin nga adda dagiti aldaw a marigatanka ngem kanayon nga adda ni Jehova kadatayo.”—Jeanette.

 Rasonable koma ti ekspektarem. Laglagipem a saan nga agpapada ti panagladingit ti tunggal maysa. Ibaga ti Biblia a ‘saan a kayat [ni Jacob] ti paliwliwa’ idi impapanna a natayen ti anakna. (Genesis 37:35) Isu a dika masdaaw no saanmo a dagus a mailiwliwag ti lidaymo.

 “Adda dagiti banag a no makitak, malagipko daydi lolak, uray no 15 a tawenen a natay.”—Taylor.

 Imadyinem a natukkolanka iti tulang. Mabalin a nakasaksakit dayta ken mabayag nga umimbag. Ngem maikkannaka ti doktor iti suhestion no kasano a matulongam ti bagim nga umimbag.

 Ti panangiliwliwag iti saem ti ipapatay ti ay-ayatem ket kapada ti sakit ti “natukkol” a tulang. Mabayag a mailiwliwag ti nakaro a panagladingit. Isu nga agan-anuska. Panunotem dagiti suhestion iti daytoy nga artikulo, ket kitaem no ania ti kasayaatan a makatulong kenka.