No luktam ti Biblia, makitam ti nakaad-adu a sasao. Ngem saanka koma a madismaya iti dayta! Imbes ketdi, panunotem a ti linaon ti Biblia ket kas iti buffet. Saanmo a makan ti amin a makitam. Ngem mabalinmo a pilien ti kayatmo a mangbussog kenka.

 Tapno mas magunggonaanka iti “pannanganmo” iti Sao ti Dios, masapul nga agpokuska iti basbasaem. Makatulong daytoy nga artikulo tapno maaramidmo dayta.

Iti daytoy nga artikulo

•  Apay nga agpokuska iti basbasaem iti Biblia?

•  Kasano a mas magunggonaanka iti panagbasam iti Biblia?

•  Ti kuna dagiti padam nga agtutubo

 No ad-adda nga agpokuska nga agbasa iti Biblia, mas magunggonaanka. Panunotem daytoy: No isawsawmo iti apagbiit ti tsaa iti napudot a danum, adda bassit ramanna. Ngem no iyupermo, naim-imas dayta.

 Kasla kasta ti panagbasa iti Biblia. Imbes nga agap-apuraka a mangbasa iti dayta, iwayaam a panunoten a naimbag ti basbasaem. Kasta ti inaramid ti nangisurat iti Salmo 119. Imbagana maipapan iti linteg ti Dios: “Pampanunotek a naimbag [dayta] iti agmalmalem.”—Salmo 119:97.

 Siempre, saanna a kayat a sawen dayta a masapul a literal nga agmalmalem a basaem ken panunotem ti Biblia. Daytoy ti punto: Inwayaan ti salmista a panunoten a naimbag ti Sao ti Dios. Nakatulong dayta kenkuana nga agaramid kadagiti nasayaat a desision.—Salmo 119:98-100.

 “Imbaga ni mamak, ‘Adda pito nga aldaw iti makalawas, ket nakaad-adu ti ar-aramidem para iti bagim kadagita nga aldaw. Apay a dim ikkan ni Jehova iti oras? Saan kadi a husto laeng nga aramidem dayta?’”—Melanie.

 No pampanunotem dagiti prinsipio ti Biblia, mas makaaramidka kadagiti nasayaat a desision—kas no mangpilika kadagiti gagayyem wenno no masulisogka nga agaramid iti dakes.

•   Agplano. “Agaramidka iti eskediulmo nga agbasa iti Biblia,” imbaga ti tin-edyer nga agnagan Julia. “Ammuem no ania ti basaem, kaano a basaem, ken no sadino a basaem dayta.”

•   Mangaramid iti pamay-an tapno makapagpokus nga agbasa. “Agbirokka iti naulimek a lugar,” imbaga ti balasang nga agnagan Gianna. “Ibagam met iti pamiliam ti eskediulmo nga agbasa iti Biblia tapno saandaka nga istorbuen.”

   No gadyet ti us-usarem nga agbasa, i-off-mo ti amin a notification. Mabalin pay ketdi a ti nayimprenta a Biblia ti basaem. Ti agpayso, ipakita ti research a no nayimprenta a material ti basaem, nalaklakam a maawatan dayta. Ngem narigrigat ti agpokus nga agbasa no gadyet ti pagbasaam.

   “Mais-istorboak no gadyet ti pagbasaak. Makaawatak iti notification wenno ma-low-bat ti gadyetko wenno agawan ti Internet. Ngem no printed ti basaek, basta adda silaw, mayaten.”—Elena.

•   Agkararag nga umuna. Agpatulongka ken Jehova tapno maawatam, malagipmo, ken magunggonaanka iti paset ti Biblia a planom a basaen.—Santiago 1:5.

   Tapno maaramidmo ti inkararagmo, ammuem ti ad-adu pay iti salaysay a basbasaem. Kasanom a maaramid dayta? No us-usarem ti JW Library app wenno basbasaem ti Biblia online, mabalinmo nga i-click ti bersikulo tapno makitam dagiti kanayonan a research ken artikulo maipapan iti dayta.

•   Saludsodam ti bagim. Kas pagarigan: ‘Ania ti masursurok iti daytoy a salaysay maipapan ken Jehova? Itampokna kadi ti maysa a kualidadna a mabalinko a tuladen?’ (Efeso 5:1) ‘Ania a leksion ti masursurok iti daytoy a salaysay a mayaplikarko iti biagko?’ (Salmo 119:105) ‘Mausarko kadi ti nabasak tapno matulongak ti dadduma?’—Roma 1:11.

   Mabalinmo met nga isaludsod iti bagim, ‘Kasano a konektado ti nabasak iti tema ti Biblia?’ Nakapatpateg unay dayta a saludsod. Apay? Gapu ta amin nga adda iti Biblia—manipud Genesis agingga iti Apocalipsis—ket konektado iti nagpateg a tema: No kasano a santipikaren ni Jehova ti naganna babaen ti nailangitan a Pagarianna ken paneknekanna nga isu laeng ti adda kalinteganna nga agturay ken ti panagturayna ti kasayaatan.