Iti agarup 145 a kilometro iti amianan ti New York City, nga asideg ti bassit a bario ti Wallkill, New York, adda kataltalonan a napateg ti pasetda iti sangalubongan a trabaho dagiti Saksi ni Jehova a panangisuro iti Biblia. Ti kaunaan kadagiti Watchtower Farms, kas ti awag itan kadagita a pasilidad, ket nagatang 50 a tawenen ti napalabas idi Enero 2, 1963.

Ni David Walker ket maysa kadagiti Saksi ni Jehova nga agserserbi iti Wallkill sipud pay idi nangrugi. Imbagana no apay a nagatang ti umuna a talon: “Umad-adu idin dagiti agtrabtrabaho iti sangalubongan a hedkuarter dagiti Saksi ni Jehova ket masapul a pakanenmi ida iti pamay-an a makaekonomiakami. Ti dadduma a talon nga us-usaren dagiti Saksi ni Jehova iti makin-amianan a paset ti New York ket innem agingga iti walo nga oras ti kaadayoda manipud iti Brooklyn. Ngem dua la nga oras ti kaadayo ti Wallkill isu a nagsayaat dayta para kadagiti kasapulanmi.” Idi agangay, inusar dagiti Saksi ni Jehova dayta a talon a pagmulaan kadagiti prutas ken nateng, pagtaraknan kadagiti manok, baboy, ken baka, ken pagaramidan kadagiti produkto manipud iti gatas. Idi kuan, adu pay a talon ti nainayon.

Iti 10 a tawen, gapu iti iyaadu dagiti Saksi ni Jehova iti intero a lubong, adda dagiti naisangsangayan a panagbalbaliw a napasamak iti Wallkill. Malaksid iti produksion kadagiti literal a mula a mabalin a maapit, narugian metten ti produksion ti literatura a makatulong iti piguratibo a trabaho a panagani a dinakamat ni Jesus. (Mateo 9:37; Lucas 10:2; Juan 4:35, 36) Adtoy ti dadduma laeng kadagiti maar-aramid idiay Wallkill.

Panagimprenta: Bayat ti katengngaan ti 1900s, ti pagimprentaan nga adda iti Brooklyn, New York, ti mangpatpataud iti kaaduan kadagiti naibasar-Biblia a literaturatayo. Ngem idi immadun ti kasapulan, saanen a magabenan dayta ti pagimprentaan iti Brooklyn. Isu nga idi 1973, nalpas ti panangibangon dagiti Saksi ni Jehova iti kanayonan a pagimprentaan iti Wallkill. Sipud idin, dagiti pasdek a maus-usar iti panagimprenta ket namin-adu a napalawa, a ti kaudian ket idi 2004.

Computer Technology: Idi 1979, maysa a grupo dagiti Saksi ni Jehova iti Wallkill ti nangrugi nga agaramid iti computerized system, a maawagan itan iti Multilanguage Electronic Publishing System (MEPS). Babaen iti dayta, posiblen ti panagipablaak kadagiti naibasar-Biblia a literatura iti nasurok nga 600 a lengguahe.

Edukasion: Idi 1988, nayakar idiay Wallkill ti Watchtower Bible School of Gilead iti Brooklyn, ket idi Oktubre 17, nangrugin dagiti klase. Idi agangay, nayakar dayta iti Watchtower Educational Center idiay Patterson, New York, idi Abril 1995.

Kas iti dadduma a talon, nagbalbaliw dagiti pamay-an ken aktibidad iti Watchtower Farms iti napalabas a 50 a tawen. Ngem maikagkagumaan latta a maipaayan iti de kalidad a taraon dagiti Saksi ni Jehova nga agtrabtrabaho kadagiti pasilidad ti Bethel iti New York.

Madama nga agibangbangon dagiti Saksi ni Jehova iti baro nga opisina, pagnaedan, ken dadduma pay a pasilidad idiay Wallkill. Tartarimaanenda met dagiti datin a pasdek. Amin dayta ti tumultulong iti Watchtower Farms tapno agtultuloy a mangsuplay kadagiti naespirituan a kasapulan ti umad-adu a Saksi ni Jehova iti dayta a paset ti lubong.

Kuna ti nadakamaten a ni David Walker: “Iti napalabas a 50 a tawen, maragsakanak a makakita no kasano nga in-inut a limmawa dagiti pasilidad iti Wallkill ken nakatulong iti sangalubongan a panagreggettayo a mangisuro kadagiti tattao iti mensahe ti Biblia!”