Idi 2014, ti Bagi a Manarawidwid dagiti Saksi ni Jehova ket nangted iti instruksion mainaig iti baro a programa a panangidanon iti mensahe ti Biblia kadagiti nasulinek a lugar iti amianan a paset ti Europa ken North America. (Aramid 1:8) Idi damo, naipamaysa ti programa kadagiti napili a komunidad iti Alaska (U.S.A.), Lapland (Finland), ken Nunavut ken Northwest Territories (Canada).

Pinullo a tawenen a bisbisitaen dagiti Saksi ni Jehova dagitoy a nasulinek a rehion tapno mangasaba. Nupay kasta, apagbiitda laeng sadiay, ken masansan nga agibunongda laeng kadagiti naibatay iti Biblia a publikasion.

Babaen iti daytoy a baro a programa, dagiti sanga nga opisina a mangiwanwanwan iti trabaho dagiti Saksi ni Jehova kadagiti nasulinek a lugar iti amianan ket agawis kadagiti amin-tiempo a ministro (payunir). Agtalinaed dagitoy kadagiti napili a teritoria iti saan a nakurkurang ngem tallo a bulan. No adu ti interesado nga agadal iti Biblia iti komunidad, mabalin a nabaybayag nga agtalinaed dagitoy a ministro ken mangangayda pay kadagiti taripnong para iti publiko.

Siempre, adda dagiti naisalsalumina a problema iti Amianan. Adda dua a payunir a naibaon idiay Barrow, Alaska. Ti maysa ket agnanaed idi iti makin-abagatan a California ket ti sabali, naggapu idiay Georgia, U.S.A. Iti umuna a winter a kaaddada idiay Barrow, napadasanda ti nakalamlamiis a temperatura a dimmanon iti minus 38 degrees Celsius (-36°F)! Ngem iti las-ud laeng ti sumagmamano a bulan sipud iti isasangpetda, agarup 95 a porsiento ti nabisitadan a pagtaengan iti dayta a siudad ken nakairugida iti uppat a panangyadal iti Biblia, a pakairamanan ti maysa a lalaki nga agnagan iti John. Ad-adalenna ken ti nobiana ti libro nga Ania a Talaga ti Isursuro ti Biblia? ken ibagbagana met dagiti masursurona kadagiti gagayyem ken katrabahuanna. Basbasaenna pay ti inaldaw a teksto manipud iti Panangsukimat iti Kasuratan iti Inaldaw babaen ti app a JW Library iti selponna.

Awan kalsada nga agturong idiay Rankin Inlet iti Nunavut a teritoria ti Canada. Isu a nageroplano ti dua a payunir a napan iti dayta a bassit a purok ket nakairugida iti sumagmamano a panangyadal iti Biblia. Kalpasan a nabuya ti maysa a lalaki ti video nga Ania ti Maar-aramid iti Kingdom Hall?, dinamagna no kaanoda nga agibangon iti Kingdom Hall iti komunidadda. Sa imbagana, “No addaakto pay inton makaibangonkayo, umayakto makigimong.”

“Nakalamlamiis ken nakapuspuskol ti niebe,” kinuna dagiti payunir a naidestino idiay Savukoski, Finland, a sadiay agarup sangapulo a daras nga ad-adu ti ugsa (reindeer) ngem kadagiti tattao. Ngem kunada nga apag-isu ti tiempo nga isasangpetda. Apay? “Naan-anay a nawanasmi dagiti teritoria,” kinunada. “Naikkat dagiti niebe ken mamanmantener dagiti kalsada a mapan kadagiti purok ken nasulinek a lugar. Ad-adu a tiempo ti kaadda dagiti tattao iti pagtaenganda gapu iti nakaro a lamiis.”

Nagsayaat ti resulta ti panangikagumaan a mangiranud iti kinapudno iti Biblia kadagiti nasulinek a lugar iti amianan. Kalpasan a binisita ti dua a payunir ti mayora iti maysa a siudad ti Alaska, nagpintas ti mensahe nga inkabilna iti social media mainaig iti pannakisaritana kadakuada. Nangikabil pay iti ladawan ti tract nga Ania ti Pagarian ti Dios?

Idiay Haines, Alaska, walo ti immatender iti miting nga inangay ti dua a payunir iti public library. Impadamag ti lokal a pagiwarnak nga adda dua a lallaki a taga-Texas ken North Carolina iti ilida a mangituktukon iti panagadal iti Biblia iti pagtaengan. Iti ngudo ti damag, kastoy ti mabasa: “Mapankayo iti jw.org tapno ad-adu pay ti maammuanyo.”