Kadagiti dadakkel a siudad iti intero a lubong, kanayon a makakitkita dagiti aglabas a tattao kadagiti cart nga addaan kadagiti publikasion a naibatay iti Biblia nga impablaak dagiti Saksi ni Jehova. Kas pagarigan, idiay Germany, nangikabil dagiti Saksi kadagiti displey iti Berlin, Cologne, Hamburg, Munich, ken dadduma pay a siudad nga adu ti taona.

Ngem kadagiti ngay babbabassit nga ili a pagbakbakasionan dagiti German, epektibo met la kadi dagitoy a makaatrakar a displey? Magustuanto ngata daytoy dagiti tattao kadagiti resort nga adda kadagiti siudad iti makin-amianan a paset ti pagilian ken kadagiti komunidad iti igid ti baybay ken kadagiti isla iti Baltic ken North sea? Idi 2016, nangorganisar iti espesial nga urnos ti sanga nga opisina dagiti Saksi ni Jehova iti Central Europe tapno masungbatan dagita a saludsod. Manipud iti Mayo agingga iti Oktubre, agarup 800 a Saksi nga agus-usar iti cart kadagiti dadakkel a siudad—a pakairamanan dagiti adayo a lugar a kas iti Vienna, Austria​—ti nagboluntario a mangipuesto kadagiti cart iti agarup 60 a lokasion iti makin-amianan a paset ti Germany.

Siraragsak nga inawatda dagiti Saksi. Kuna ti maysa a boluntario: “Naginteres dagiti tattao. Mannakigayyemda, nausioso, ken kayatda ti makisarita.” Kuna ni Heidi, a nagboluntario iti ili ti Plön: “Kalpasan ti mano nga aldaw, imbilangdakamin dagiti tattao kas kalugaranda. Dadduma a nakailasin kadakami ti agpayapay no makitadakami.” Insenias ti maysa nga umel kadakuada: “Addakayo iti amin a lugar!” Agaw-awidda idi ken dagiti gagayyemna manipud iti okasion para kadagiti umel iti makin-abagatan a paset ti Germany, a sadiay a naam-ammona dagiti Saksi ni Jehova.

Kayat pay ti dadduma a lumugar ti tumulong. Iti isla ti Wangerooge, immasideg ti maysa a polis kadagiti Saksi ken nangted iti tip tapno ad-adu ti makasaritada. Idiay Waren an der Müritz, bayat nga ipakpakita ti kapitan ti bangka kadagiti pasaherona dagiti napintas a lugar, intudona ti cart iti pier, sa kinunana: “Ken idiay, adda maammuanyo maipapan iti Dios.” Adu a bakasionista ti immasideg kadagiti cart ket binasada dagiti poster.

Imbaga dagiti turista ken dagiti lumugar nga interesadoda kadagitoy tallo a broshur:

• Pudno Aya a Maseknan ti Dios Kadatayo? Kinuna ti maysa a turista: “Nabayag a pampanunotek dayta a saludsod. Ita, bayat ti panagbakasionko, adda met laengen panawenko a mangbasa maipapan iti dayta.”

• Naimbag a Damag Manipud iti Dios. Imbaga ti maysa a lakay a dismayado iti relihion. Tinulonganda tapno maammuanna nga awan ti tao a makasolbar kadagiti problematayo; ti Dios laeng ti makaaramid iti dayta. Naragsakan ti lakay a nangawat iti broshur ket inkarina a basaenna.

• Dagiti Masursurok iti Biblia. Pinalubosan ti maysa nga ama a mangala ti balasitangna iti broshur a nadisenio para kadagiti ubbing. Nangala pay iti kopia ti libro a napauluan Ti Librok dagiti Estoria ti Biblia sa kinunana: “Nasayaat daytoy para iti pamiliak.”

Nangala dagiti aglabas iti nasurok a 3,600 a publikasion. Nagkiddaw ti dadduma a mabisita ida dagiti Saksi ken maituloy ti saritaanda.

Nagustuan dagiti Saksi ti kapadasanda a nakiraman iti dayta a proyekto. Nagboluntario ni Jörg ken ni baketna a Marina a mapan iti lugar nga asideg iti Baltic Sea. “Ibilangmi dayta nga espesial a regalo,” kunada. “Na-enjoy-mi dagiti pinarsua ti Dios ken naisaritami pay iti sabsabali ti maipapan kenkuana.” Kuna ti agtawen iti 17 a ni Lukas: “Magustuak unay dayta! Nag-enjoy-ak la ngaruden, nakaitedak pay iti nagpateg a banag iti sabsabali.”